Իրանագետ Արտյոմ Տոնոյանի «Caspian Frontiers» տելեգրամյան ալիքից տեղեկանում ենք.
Իրանի դեմ Իսրայելի սկսած ռազմական գործողությունների առնչությամբ հայտարարություն է տարածել Ադրբեջանում գործող պանթյուրքական կազմակերպություններից ՄԱՕ-ն (Միացյալ Ադրբեջանի օջախներ, Bütöv Azərbaycan Ocaqları / BAO):
🔷 Հարկ է նշել, որ ի տարբերություն Ադրբեջանի կողմից ֆինանսավորվող, բայց ֆորմալ առումով այլ պետությունների տարածքներում գործող բազմաթիվ պանթյուրքական կազմակերպությունների, ՄԱՕ-ն գրանցված է և գործում է հենց Ադրբեջանի տարածքում։
🔷 Սկզբում այն գործել է Ադրբեջանի ժողճակատի համակարգման ներքո, սակայն հետագայում՝ Ալիևների իշխանության շրջանում, անցել է նախագահի աշխատակազմի վերահսկողության տակ և իրականացնում է հակաիրանական և անջատողական քարոզչություն Ատրպատականի տարածքում ոչ թե ամենօրյա ռեժիմով, այլ՝ ըստ պետական պատվերի և ըստ ժամանակային նպատակահարմարության։
Կարդացեք նաև
🔷 Ստորև դրվող հայտարարության տեքստում, որը թվագրել են հունիսի 16-ով, հիշվել է նաև «Հայաստան» անունը։
🔷 ՄԱՕ-ի հայտարարության մեջ Հայաստանը մեղադրվում է այս օրերին հակաադրբեջանական բնույթի ապատեղեկատվություն տարածելու մեջ։
Հայտարարություն
Ինչպես հայտնի է, արդեն մի քանի օր է, ինչ Իսրայելը ռազմական գործողություններ է սկսել Իրանի Իսլամական Հանրապետության դեմ, և դրանք ներկայումս փոխադարձ բնույթ են կրում։
Առկա տվյալների համաձայն՝ ռազմական գործողությունների հետևանքով ոչնչացվել են Իրանի տարածքում տեղակայված տասնյակ «երկիր-երկիր» տեսակի հրթիռային կայաններ, հրթիռների պահեստներ և այլ ռազմական օբյեկտներ, հարվածներ են հասցվել մի քանի միջուկային օբյեկտների, սպանվել են բազմաթիվ բարձրաստիճան սպաներ, այդ թվում՝ միջուկային ֆիզիկայի ոլորտում աշխատող գիտնականներ։
Իրան-Իսրայել պատերազմական իրավիճակի ֆոնին Իրանում, ինչպես նաև Հայաստանում գործող, ինչպես նաև Արևմուտքում հայկական սփյուռքի և լոբբիստական կազմակերպությունների ազդեցության ներքո գտնվող մի շարք լրատվամիջոցներ սկսել են տարածել ապատեղեկատվական բնույթի, անհիմն ու հորինովի մեղադրանքներ Ադրբեջանի Հանրապետության դեմ։
Պարսկական շովինիստական շինծու ռեժիմը և դրան մոտ կանգնած աղբյուրները տեղեկություններ են հրապարակում, այն մասին, թե Ադրբեջանի Հանրապետությունն իբր թույլատրել է Իսրայելին իր կործանիչներով թռիչքներ իրականացնել Կասպից ծովի վրա և ավիահարվածներ հասցնել Իրանին։
Ադրբեջանը բազմիցս պաշտոնապես հայտարարել է, որ իր տարածքը որևէ երկրի կողմից երբեք չի կարող օգտագործվել այլ պետության դեմ հարձակում իրականացնելու նպատակով, և Ադրբեջանի Հանրապետությունը մշտապես հավատարիմ է մնացել այս դիրքորոշմանը։
Մենք՝ որպես Միացյալ Ադրբեջանի օջախներ (ՄԱՕ), վճռականորեն դատապարտում ենք Ադրբեջանի Հանրապետության դեմ ուղղված ապատեղեկատվական, անհիմն և հորինովի մեղադրանքների տարածումը։
Միաժամանակ հատուկ շեշտում ենք՝ Իսրայելի պետության և Իրանի Իսլամական Հանրապետության միջև շարունակվող ռազմական գործողությունների ընթացքում քաղաքացիական բնակչության անվտանգությունն ապահովելու անհրաժեշտությունը։
«Միացյալ Ադրբեջանի օջախներ»
Բաքու, 2025թ․ հունիսի 16
