Հակակոռուպցիոն դատարանում Լիլի Դրմեյանի նախագահությամբ ըստ հայցի ՀՀ զինվորական կենտրոնական դատախազության ընդդեմ ՀՀ ԶՈՒ ԳՇ նախկին պետ եւ Արցախի պաշտպանության նախկին նախարար Մովսես Հակոբյանի եւ Արմեն Հարությունյանի՝ որպես պետությանը պատճառված վնասի փոխհատուցում գումարի բռնագանձման պահանջի մասին դատական նիստը սկզբից կարճ ժամանակով ընդմիջվեց, որպեսզի Արմեն Հարությունյանի ներկայացուցիչ, փաստաբան Ենոքյանը հասցնի ներկայանալ դատարան:
Նիստը վերսկսելուց առաջ նախագահող դատավորը արձանագրեց, որ այս փուլում անխուսափելի է պետության անվտանգության հարցերին առնչվող փաստական տվյալների հրապարակման հնարավորությունը եւ հայտարարեց, որ դատարանը իր նախաձեռնությամբ որոշում է այս դատական նիստը, պետական անվտանգության պաշտպանության անհրաժեշտությամբ պայմանավորված, եւս անցկացնել դռնփակ կարգով: Հետեւաբար, դռնփակ դատական նիստին կարող են ներկա գտնվել միայն գործի մասնակիցները, ինչպես նաեւ նիստի քարտուղարը, դատական նիստի կարգադրիչը:
Աշոտ ՀԱԿՈԲՅԱՆ
