Իրանի վրա իսրայելական հարձակումներին միանալու վերաբերյալ ամերիկյան իշխանությունների խորհրդապահությունը որոշակիորեն մեղմվել է։ Դոնալդ Թրամփն այս հարցով իր որոշումը կկայացնի «երկու շաբաթվա ընթացքում», – մամուլի ասուլիսի ժամանակ փոխանցել է Սպիտակ տան մամուլի ծառայության ղեկավար Քերոլայն Լեւիթը։
Պաշտոնյայի խոսքով՝ տեղեկացված է մամուլի էջերում շրջանառվող տարատեսակ շահարկումների մասին։ Լեւիթի հաղորդմամբ՝ ԱՄՆ նախագահն այսպես է որոշել՝ հաշվի առնելով «մոտ ապագայում Իրանի հետ բանակցությունների էական հնարավորությունը»՝ ավելացնելով՝ բանակցություն «կարող է լինել, կարող է եւ չլինել»։ CNN-ը գրում է, որ Թրամփի վարչակազմն այս քայլին է դիմում՝ հույսով, որ ամենժամյա իսրայելական հարձակումների ֆոնին ընթացող բանակցություններում ԻԻՀ-ն կհրաժարվի իր «անզիջում դիրքորոշումից, այդ թվում՝ ուրանի հարստացման ծրագրից»։
Կարդացեք նաև
Համատեքստ
Իսլամական Հանրապետության վրա Իսրայելի արդեն մեկ շաբաթ ձգվող օդային հարձակումների մեկնարկից ի վեր ԱՄՆ-Իրան բանակցություններ չեն անցկացվել, անցած շաբաթավերջին Մուսկաթում ծրագրված բանակցությունները չկայացան, իսկ ԶԼՄ-ները նշում են, որ նախագահ Թրամփի թիմում չեն կողմնորոշվում՝ կոնկրետ ինչ քայլեր ձեռնարկել Իրանի հարցով։
Արսեն ԱՅՎԱԶՅԱՆ
