«Հայաստանի ընդդիմադիր շարժումների մեջ «Սրբազան պայքարը» ամենաազդեցիկն է եւ կդառնա, քանի որ այս շարժումը չունի տնտեսական շահեր։ Շարժման ղեկավարությունը երբեւիցե չի եղել տնտեսական գործարքների մեջ։ Խոսքը գնում է անկեղծ շարժման մասին, որը առաջացել է Տավուշում տարածքների միակողմանի զիջման պատճառով»,- «Հայ Առաքելական եկեղեցի․ պետականաշինություն եւ արտաքին քաղաքականություն» թեմայով համաժողովի ժամանակ լրագրողների հետ զրույցում ասաց Նիկոլ Փաշինյանի նախկին գլխավոր խորհրդական Արսեն Գասպարյանը։
Այսօր առավոտից սկսված խուզարկությունների եւ ձերբակալությունների մասին էլ բանախոսը հայտարարեց․ «Ոչ մի հեղաշրջման բան չկա, դրանք բոլորը քաղաքական հետապնդումներ են»։ Իր գնահատմամբ՝ 2021 թվականից հետո ընտրություն կատարած 680 հազար մարդիկ մտածելու բան ունեն, քանի որ կարծում էին, թե ժողովրդավարության համար էին ընտրություն կատարում։
Անդրադառնալով Եկեղեցու դեմ իշխանության ձեռնարկած քայլերին էլ, ասաց․ «Նման դրսեւորումներ եղել են Արեւելյան Եվրոպայում՝ սառը պատերազմի տարիներին, նույն մոտեցումները կային նախկին Չեխոսլովակիայում, թե ինչպես էին կոմունիստական իշխանությունները ճնշում կաթոլիկ եկեղեցին կամ այդ երկրներում այլ կրոնական ինստիտուտները։ Նույնը կա Կուբայում․ կաթոլիկ եկեղեցուն վերաբերվում են ինչպես մեկուսացված հիվանդների»։ Արսեն Գասպարյանը մեկ ընդհանրություն է նախանշում այդ ամենում․ «Սրանք բոլորը ձախակողմյան հեղափոխական գաղափարներ ունեցող կառավարություններ են, որոնք փորձում են ռադիկալ կերպով աշխարհիկացնել հասարակական կյանքը»։
Կարդացեք նաև
Այս ամենի նպատակն, իր բնութագրմամբ, Հայ Առաքելական եկեղեցին իշխանությունների հսկողության տակ վերցնելն է, բայց այստեղ մի կարեւոր նրբություն կա․ «Ինչքան Առաքելական եկեղեցուն ճնշելու, հասարակական կյանքից բացառելու փորձեր արվեն, Եկեղեցին այնքան մեծ եւ ընդգրկուն դեր է խաղալու ներքին կյանքում, նաեւ քաղաքականության մեջ»։
ՀԱԵ-ի մասով Փաշինյանի եւ Ադրբեջանի կրոնական առաջնորդի համընկած հայտարարությունների մասով էլ, բանախոսը նկատում է՝ Թուրքիայի եւ Ադրբեջանի կողմից Հայաստանի նկատմամբ ռազմական էքսպանսիայից հետո, բնական է նաեւ քաղաքական էքսպանսիան, ինչի ականատեսն ենք լինում այժմ։
Մանրամասները՝ տեսանյութում
Նելլի ԳՐԻԳՈՐՅԱՆ
