Երևանի քաղաքապետարանի աշխատակիցները Հյուսիսային պողոտայից ապամոնտաժել են գովազդային էկրանները, որոնց վրա գործարար Սամվել Կարապետյանի լուսանկարն էր՝ «Ազատություն Սամվել Կարապետյանին» գրառմամբ: Գովազդային վահանակները տեղադրված էին Կարապետյանին պատկանող «Տաշիր սթրիթ» մոլի մուտքերի մոտ:
Երևանի քաղաքապետարանի առևտրի, գովազդի վարչության պետ Արմեն Առաքելյանն ավելի ուշ Factor.am-ի հետ զրույցում պնդել է, թե «ինքնակամ տեղադրված» վահանակներ են եղել։
Կարապետյանի ներկայացուցիչ, փաստաբան Վարդան Ալոյանը լրագրողների հետ զրույցում պնդել էր, որ տևական ժամանակ վահանակները տեղադրված են եղել և որևէ խնդիր չի եղել։ Ալոյանի խոսքով՝ այդ վահանակների վրա ժամանակին նաև Տիգրան Ավինյանի լուսանկարն է եղել։ Նա հարցնում է՝ ինչո՞ւ այն ժամանակ չի ապամոնտաժվել, և հիմա են որոշել, թե ինքնակամ են։
«Ես չեմ տեսել օրեր առաջ այնտեղ Տիգրան Ավինյանի նկարը, բայց կապ չունի՝ ում նկարն է այնտեղ եղել, այստեղ խնդիրը նկարը չէ, այլ տեղադրված գովազդային վահանակի օրինական կամ ոչ օրինական լինելը»,- ասել է առևտրի, գովազդի վարչության պետը։
Կարդացեք նաև
