Հունիսի 14-ին դաժան ու ողբերգական դեպք էր տեղի ունեցել Լոռու մարզում: Ժամը 18:50-ի սահմաններում իրավապահները տեղեկություններ էին ստացել, որ Վանաձոր քաղաքի Ուսանողական 4/31 շենքից որդին մորը ցած է նետել, ապա ինքն է ցած նետվել:
Aravot.am-ին հայտնի դարձավ, որ ինքնասպանություն գործած մայր ու որդին՝ Վլադիմիր ու Նելլի Գրիգորյանները, տարիներ շարունակ աչքի են ընկել իրենց տարօրինակ վարքով: 2015-ին նշված անձինք հարձակվել էին ոստիկանի վրա, աթոռով խփել նրա գլխին: Ոստիկանի հետ ունեցած այս միջադեպը սկսվել էր նրանից, որ Վլադիմիր Գրիգորյանը մտել էր հարեւանի տուն ու այդտեղ հարեւանի անչափահաս երեխաների աչքի առաջ կտրել դաստակները, սարսափի մեջ պահել երեխաներին: Հետո գնացել էր իր տուն ու փակվել տանը:
Երբ հարեւանների ահազանգով ոստիկաններ են եկել, տանտերերը դուռը ոստիկանի առջեւ բացել են ու իրենց հետ նրան էլ փակել տանը, փորձել խլել ոստիկանի զենքը, աթոռով ու այլ իրերով խփել նրա գլխին՝ պատճառելով առողջական լուրջ վնասվածքներ: Այդ ծեծկռտուքի եւ գոտեմարտի ժամանակ էլ ոստիկանի արձակած կրակոցից Վլադիմիր Գրիգորյանը հրազենային վիրավորում է ստացել:
Կարդացեք նաև
Դեպքի համար մայր ու որդի ձերբակալվել են, քրեական հետապնդման ենթարկվել:
Սա առաջին դեպքը չէր, որ Վլադիմիր Գրիգորյանը հայտնվել էր իրավապահների ուշադրության ներքո: Նա նաեւ հաշվառված է եղել հոգեբուժական դիսպանսերում: Դրանից առաջ դանակահարվել էր իր տանը:
Դատալեքսից տեղեկանում ենք, որ տղամարդը նախկինում էլ ունեցել է դատվածություն: Մոր ու իր ինքնասպանությունից շաբաթներ առաջ Վլադիմիր Գրիգորյանը դուրս է եկել ազատազրկման վայրից:
Վլադիմիր Գրիգորյանն ուներ բարձրագույն կրթություն, ՀՀ էր եկել ՌԴ-ից:
Արփինե ՍԻՄՈՆՅԱՆ
