Այսօր քննչական կոմիտե էր ներկայացել նաեւ անձեռնմխելիությունից զրկված ԱԺ «Հայաստան» խմբակցության պատգամավոր Սեյրան Օհանյանը:
-Հաշվի առնելով, որ 18 ժամվա ընթացքում մեղադրանք պետք է առաջադրվի, դրա համար ներկայացել եմ,- լրագրողներին ասաց Օհանյանը պարզաբանելով, որ այսօր միայն հարցաքննվել է:
Նախաքննության գաղտնիությունից ելնելով՝ պարոն Օհանյանը չկարողացավ հայտնել, թե քրեական գործով իրեն վերագրվող որ դրվագների հետ համաձայն չէ: Միայն ասաց, որ շատ ՔՊ-ականներ արդեն իսկ տարբեր դրվագներ բացահայտել են. «Էլ չեմ ասում, որ ելնելով իմ առողջական վիճակից՝ իրենք այս ամենը պետք է հետաձգեին: Բայց մեկնաբանել են, թե առողջական խնդիրներ չունեմ: Բայց վերջին մեկուկես ամսվա ընթացքում մեկ անգամ նախաինսուլտային վիճակ է եղել մոտս ու պրոթեզի եւ ողնաշարի վերականգնողական գործընթացի հետ կապված խնդիրներ: Դրանով եմ զբաղված եղել: Որեւէ առիթ չեմ տվել այս տարիների ընթացքում, որ ինչ-որ փաստաթղթով ու իմ առողջական վիճակով թաքնված լինեմ»:
Լրագրողներից մեկը պարոն Օհանյանին հիշեցրեց Նիկոլ Փաշինյանի ավելի վաղ կատարած հայտարարությունը, թե ձեր տեղը «ԱԱԾ պադվալներն» են, ապա հարցրեց՝ հիմա իրավապահները Փաշինյանի այս հայտարարությո՞ւն են կյանքի կոչում: Ի պատասխան Օհանյանն ասաց. «Ակնհայտ է, որ այսօր ոչ միայն իմ, այլեւ ՀՀ-ում որոշ արժեքների ու անհատների նկատմամբ հետապնդում է իրականացվում: Ես քաղաքական գնահատական չէի տա, եթե այս գործընթացը, որի շրջանակներում ցուցմունք եմ տվել 2018-ին, հենց այդ ժամանակ էլ որոշում էր ընդունվել: Ես քաղաքական չէի համարի, եթե այս գործընթացի հետ կապ չունենար մեր խմբակցության քարտուղար Արծվիկ Մինասյանը: Հետապնդումների շարքը շարունակական է»:
Կարդացեք նաև
Անդրադառնալով «հեղաշրջման պլանին»՝ պարոն Օհանյանը շարունակեց. «Եթե ինչ-որ բան պլանավորվել է, բացահայտել է ԱԱԾ-ն ինչու է դրա մասին խոսում ինչ-որ civic կայք, ու կոնտեքստից կտրված խոսակցություններ: Կապրենք, կտեսնենք եղե՞լ է ահաբեկչություն, թե՞ չի եղել:Ի վերջո, կա անմեղության կանխավարկած»:
Արփինե ՍԻՄՈՆՅԱՆ
