-Եթե 5000 տղաների կորստի հարցում պատասխանատվություն չի ստանձնում, ի՞նչ եք կարծում՝ հղի կնոջ վրաերթի դեպքով առնվազն բարոյական պատասխանատվություն կարո՞ղ է ստանձնել: Սա մարդու տեսակ է,- Aravot.am-ի հետ զրույցում ասաց Նիկոլ Փաշինյանի ավտոշարասյան կողմից մահացու ելքով վրաերթի զոհ դարձած հղի կնոջ Սոնա Մնացականյանի ներկայացուցիչ Րաֆֆի Ասլանյանը՝ անդրադառնալով Փաշինյանի այսօրվա պնդումներին, թե իր շարասյունը կապ չունի վրաերթի հետ:
Հիշեցնենք, որ Փաշինյանն այսպես էր հիմնավորել իր կապ չունենալու պնդումները. «Պատկերացրեք՝ դուք ավտոբուսի մեջ նստած եք, ու վարորդը մարդու վրաերթի ենթարկի, ու հետո լրագրողները գան ձեր հետեւից ու հարցնեն՝ ինչո՞ւ վրաերթի ենթարկեցիք մարդուն։ Դա իմ ավտոշարասյունը չի, դա ՀՀ վարչապետի, կոպիտ ասած, ավտոբուսն է, ՀՀ վարչապետի անվտանգությունն ու տրանսպորտացիան ապահովող ինստիտուտն է։ Ես հետեւը նստած էի։ Եթե ես մեքենաներից մեկի ղեկին լինեի, այլ բան, իսկ այս դեպքում ես դրա հետ ի՞նչ կապ ունեմ։ Ես նստած եմ ինձ սպասարկող մեքենայի մեջ եւ երեք մեքենա այն կողմ տեղի է ունենում շատ ցավալի դեպք։ Ես զանգել եմ, ցավակցել եմ։ Դատավարություն է տեղի ունենում։ Ի՞նչ անեմ ես։ Ես նույնիսկ վկա չեմ այդ գործով, որովհետեւ ես դա չեմ էլ տեսել, ես նստած եմ եղել մեքենայի մեջ, այդտեղ էլ նստած մնացել եմ»:
-Ինքը ունի ուղիղ կապ: Ինչը հաստատել է նաեւ վերջին քաղաքական հետապնդումներով՝ թե՛ Միքայել սրբազանի, թե՛ բարերար Սամվել Կարապետյանի նկատմամբ ուղիղ հրահանգներով: Այս գործերն այն դասական օրինակներն են, որ ինքը ամենալկտի ձեւով միջամտում է իրավապահների աշխատանքին, քաղաքական նպատակահարմարությունից ելնելով՝ կիրառում է քրեադատավարական գործիքակազմը:
Կարդացեք նաև
Սոնա Մնացականյանի գործով վարորդը չէր կարող ազատության մեջ մնալ, չէր կարող քրեական հետապնդում չհարուցվել պատասխանատու ղեկավար կազմի նկատմամբ, այդ թվում ՝ շարասյան ղեկավարի նկատմամբ: Այդ ամեն ինչն արվել է քաղաքական ցուցումով: Ընդ որում՝ սա ոչ թե օդի մեջ արվող հայտարարություններ են, դրանց հիմքերը կան քրեական վարույթում,- հավելեց պարոն Ասլանյանը:
