Ավագանու «Մայր Հայաստան» խմբակցության անդամ Մեսրոպ Մանուկյանը չի ընդունում իրեն առաջադրված մեղադրանքը՝ Նոր Նորք վարչական շրջանի նախկին ղեկավարի աշխատակազմի նկատմամբ անհարգալից վերաբերմունք դրսևորելու, աշխատակազմի բնականոն աշխատանքը խոչընդոտելու դեպքով, որը որակվել է որպես խուլիգանություն:
Հիշեցնենք, որ վարչական շրջանի նախկին ղեկավար Տիգրան Տեր-Մարգարյանի աշխատակազմում տեղի ունեցած ծեծկռտուքի և դրան նախորդող օրը բլոգեր Արթուր Չախոյանի և ավագանու անդամ Մեսրոպ Մանուկյանի կողմից վարչական շրջանի աշխատակազմի նկատմամբ անհարգալից վերաբերմունք դրսևորելու դեպքերի վերաբերյալ նախաձեռնված քրեական վարույթների նախաքննությունն ավարտվել է:
-Ինձ հետաքրքիր է, թե իր կենսակերպի կամ ինչ-որ մի բանի հետ ասոցացվո՞ւմ էր իմ ակցիան, որ իրեն ստորացված է զգացել: Որովհետեւ քաղաքական ակցիա եմ արել, ոչ մի միտում չեմ ունեցել ինչ-որ մեկին ստորացնելու: Միգուցե մանկական տրավմա ունի, այդ ակցիան իրեն որեւէ բա՞ն է հուշում, չեմ կարող ասել,- մեզ հետ զրույցում ասաց Մեսրոպ Մանուկյանը:
Նրա խոսքով՝ ինքը հրաժարվել է այս գործով ցուցմունք տալուց, որովհետեւ մեղադրանքն իր համար պարզ չէ, նույնիսկ խնդրել է առերեսում այս գործով տուժող վարչական շրջանի նախկին ղեկավարի հետ, սակայն վարույթ իրականացնող մարմինը առերեսում չի կազմակերպել. «Այս գործով տուժողն է ինքը, հիմա ուզում եմ հասկանալ՝ ո՞ր պահից է էդ լավ տղեն, քուչի տղեն ստորացած զգացել: Ինձ շատ հետաքրքիր է, հարցեր կան, որոնք անպատասխան մնացին: Մի անգամ են ինձ հրավիրել հարցաքննության, չեմ հասկացել՝ խնդիրն ինչ է, հրաժարվել եմ: Ասել եմ ՝ մի հատ բազմակողմանի վերլուծություն արեք: Ինձ համար անհասկանալի էր այն մեղադրանքը, որ առաջադրել են, այն իրականության հետ կապ չուներ: Նախ հետ ու առաջ կար՝ ով էր առաջինը զանգել, ով էր հայհոյել, իմ անունը կար, չկար, ուղղակի էդ գործը թքել, կպցրել են»:
Կարդացեք նաև
Մեսրոպ Մանուկյանը պնդում է՝ իր քաղաքական ակցիայի ժամանակ չի եղել ստորացնող, վիրավորող գործողություն. «Հիմա քաղաքակիրթ երկրներում նաեւ ձու են բերում, շպրտում: Եթե ձու բերեի, շպրտեի, դա էլ իր համար ուրի՞շ բան պետք է ասոցացվեր: Կրկնում եմ՝ իրեն չեմ ստորացրել, ոչ էլ նման ցանկություն եմ ունեցել: Ինքն այդ ակցիայի նախորդ օրը խուլիգանի պես լկտի է իրեն պահել, լկտի բառապաշար է օգտագործել, բայց ես քաղաքական մարդ եմ, քաղաքական ակցիա եմ ընդամենն արել»:
Մենք փորձեցինք կապ հաստատել նաեւ վարչական շրջանի նախկին ղեկավար Տիգրան-Տեր Մարգարյանի հետ, սակայն մեզ չհաջողվեց նրանից պարզաբանում ստանալ:
