-Ես չեմ պատկերացնում՝ ինչ են պլանավորել ու ինչպես են պատկերացնում այդ գործընթացը, բայց նման ցանկացած միջամտություն եկեղեցական կյանքին ու ինքնավարությանը դատապարտելի է ու անպտուղ փորձեր են,- այսօր անդրադառնալով Ամենայն Հայոց կաթողիկոսից վեհարանն ազատելու մասին Նիկոլ Փաշինյանի հայտարարություններին՝ ասաց Մայր Աթոռի Տեղեկատվական համակարգի տնօրեն Տեր Եսայի քահանա Արթենյանը:
Նրա խոսքով, վերջին շրջանում շարունակվող անհանդուրժողականության, բռնության կոչերն արդեն խոսում են այն մասին, որ մարդկանց նպատակը ոչ թե ինչ-որ բան բարեփոխելն է, այլ ավելի շատ հրահրելն է ու ներքին պառակտվածությունը, հասարակության մեջ բեւեռացումը ավելի խորացնելն է. «Մենք կոչ ենք անում ու միշտ աղոթում ենք, որ մեր ժողովուրդը չտրվի այդ սադրանքներին, լինենք միաբան ու սիրով համախմբված:
Մենք ամեն օր աղոթում ենք մեր երկրի խաղաղության, մեր հոգու փրկության համար: Չեմ պատկերացնում՝ ինչպես կզարգանա ընթացքը, կապրենք՝ կտեսնենք: Ես կարծում եմ՝ որեւէ հավատացյալ մարդ երբեւէ չի հանդգնի ոտնձգություն իրականացնել մայր եկեղեցու եւ որեւէ հոգեւորականի նկատմամբ»:
Կարդացեք նաև
Արփինե ՍԻՄՈՆՅԱՆ
