2025 թվականի հուլիսի 22-ին Ֆրանսիայի Ազգային ժողովի պատգամավորներ Լորան Վոկիեն և Ալեքսանդրա Մարտինին Եվրոպական հարցերի հանձնաժողովին են ներկայացրել բանաձևի առաջարկ, որի նպատակն է աջակցել Հայաստանի՝ Ադրբեջանի հետ խաղաղության հաստատաման ջանքերին և կոչ անել Ադրբեջանին ազատ արձակել այնտեղ պահվող բոլոր հայ բանտարկյալներին։
Պատգամավորներն իրենց խոր մտահոգությունն են հայտնել Արցախի հայ ժողովրդի՝ իրենց պատմական հայրենիքից բռնի տեղահանթյան, էթնիկ զտումների, քաղբանտարկյալների և բոլոր հայ գերիների վերաբերյալ։ Բանաձևի առաջարկում պատգամավորները հիշեցնում են, որ ժողովուրդների ինքնորոշման իրավունքի հարգումը պետք է տարածվի նաև Արցախի հայ բնակչության նկատմամբ, բացի այդ նշվում է նաև Ադրբեջանի վերահսկողության տակ գտնվող բոլոր տարածքներում հայ բնակչության շարունակական ոչնչացման Ադրբեջանի ռազմավարության մասին, ինչը ենթադրում է նաև պատմական, մշակութային և կրոնական ժառանգության համակարգված ոչնչացում։
Փաստաթղթում կոչ է արվում միջազգային հանրությանը անվտանգության երաշխիքների պայմաններում Ադրբեջանից պահանջել ապահովելու հայ բնակչության՝ Արցախ վերադառնալու իրավունքի իրացումը, ինչպես նաև դիմում է Ֆրանսիայի կառավարությանը և Եվրոպական Միությանը Ադրբեջանից պահանջելու այնտեղ պահվող հայ գերիների անհապաղ ազատ արձակումը՝ հորդորելով ապագա ցանկացած համագործակցություն պայմանավորել մարդու իրավունքների հանդեպ հարգանքով։
Լեռնային Ղարաբաղի փախստականների իրավապաշտպան միությունը բարձր է գնահատում Ֆրանսիայի Ազգային ժողովի պատգամավորների գործուն քայլերն՝ ուղղված բռնի տեղահանված արցախահայերի անվտանգ վերադարձի իրավունքի երաշխավորմանը, նրանց ոտնահարված իրավունքների վերականգնմանը և Ադրբեջանում պահվող բոլոր հայ գերիների ազատ արձակմանը:
Կարդացեք նաև
ԼՂ փախստականների իրավապաշտպան միություն
