«Ի՞նչ կարող է փոխել այս փաստաթուղթն և այս նախագիծը ՀՀ–ՌԴ հարաբերություններում։ Բայց նախագծով ՀՀ-ն ՌԴ-ի հետ երկաթուղային կապ է ստանում, որը մենք 30 տարի չունենք։ Ընդ որում, այս տրամաբանության մեջ այդ երկաթուղային կապը մենք կարող ենք ստանալ TRIPP-ով և առանց TRIPP։ Կարող է երկաթուղային կապ լինել Վրաստան–Ադրբեջան, էլ չեմ ասում, որ կարող է լինել երկաթուղային կապ մի քանի սցենարով»,– լրագրողների փաստմանը, թե կան մտահոգություններ, որ Թրամփի ուղին կհարվածի տարածաշրջանում ՌԴ-ի ու Իրանի առևտրային և լոգիստիկ շահերին, ինչպես նաև կնվազեցնի Չինաստանի հետագա դերակատարությունը, Սպիտակ տան հանդիպումից հետո հրավիրված մամուլի ասուլիսի ժամանակ այսպես արձագանքեց ՀՀ վարչապետ Նիկոլ Փաշինյանը։
Նաև փաստեց՝ չմոռանանք, որ այս պահին գոյություն ունեցող ՀՀ երկաթուղիները գտնվում են ՌԴ-ի կառավարման ներքո․ «Գուցե հետաքրքրություն առաջանա ՌԴ-ի կողմից ներդրում իրականացնել Իջևան–Հրազդան, Իջևան–Ղազախ երկաթուղին վերականգնելու համար։ Այստեղ նաև անհրաժեշտ կլինի Ադրբեջանի համաձայնությունը։ Մենք երկաթուղային կապ ենք ստանում Իրանի հետ, երկաթուղային կապ ենք ստանում Կենտրոնական Ասիայի հետ՝ լաստանավային սցենարով, այդ թվում՝ Չինաստանն է ստանում նոր երկաթուղային անցում դեպի արևմուտք, որն այս պահին գոյություն չունի։ Էական է դիտանկյունը, թե որ կողմից ենք նայում։ Գուցե այս նախագիծը կարող է լավ հնարավորություն դառնալ, որ տնտեսական համագործակցություն սկսվի Իրանի և ԱՄՆ-ի հետ, ՌԴ-ի և ԱՄՆ-ի միջև։ Չմոռանանք, որ Իրանի ընկերությունն իրականացնում է հյուսիս–հարավ ավտոճանապարհի կառուցումը, առաջիկայում կսկսենք երկաթուղու կառուցումը․ դա կարող է նաև գործակցության հնարավորություն բացել, Երասխ–Ախուրիկ երկաթուղու վերագործարկման հնարավորություն կարող է բացել»։
Կարդացեք նաև
Տաթև ՀԱՐՈՒԹՅՈՒՆՅԱՆ
Լուսանկարը՝ ՀՀ կառավարության
