Aravot.am-ը Շիրակի պետական համալսարանի ռեկտոր Երվանդ Սերոբյանից հետաքրքրվեց՝ նոր ուսումնական տարում կբարձրանա՞ արդյոք բուհի աշխատակիցների աշխատավարձը, բուհի բյուջեն ունի՞ նման հնարավորություն։ Նշենք, որ այս բուհում որոշակիորեն բարձրացել են նաև ուսման վարձավճարները։
Երվանդ Սերոբյանը պատասխանեց․ «Մենք միշտ տվել ենք 13-րդ աշխատավարձ, այս տարի առաջին անգամ հունիսին տվեցինք աշխատավարձի կեսի չափով պարգևավճարներ բոլոր աշխատակիցներին։
Իհարկե, առաջին հնարավորության դեպքում դա կարվի, բայց ասեմ՝ աշխատավարձի համահավասար բարձրացման մեխանիզմը, ինձ թվում է, այդքան էլ արդար չէ։ Եվ հիմա մենք ինտենսիվորեն աշխատում ենք աշխատակիցների վարկանիշավորման վրա, ծանր աշխատանք է։
Ամենայն հավանականությամբ հաջորդ տարվա համար մենք կունենանք լրավճարներ, պարգևավճարներ, դրանք կտրվեն՝ ըստ վարկանիշավորման։ Եվ այն աշխատակիցները, որոնք կունենան որոշակի շեմից բարձր վարկանիշ, կարող է շատ լուրջ հավելավճար լինի մեկ տարով, յուրաքանչյուր տարի փոխելով՝ կախված դրանից։ Այսինքն մենք առայժմ փորձում ենք այդ ճանապարհով գնալ։
Կարդացեք նաև
Բայց կուզենայի ասել, որ այս պահին բուհը շատ կայուն ֆինանսական վիճակ ունի, ավելին, ես ինքս գիտխորհրդում էլ եմ հայտարարել մեկ-երկու անգամ, բուհը կայունացման շրջանից թևակոխել է արդեն զարգացման փուլ։ Եթե դուք նայեք և՛ մեր ենթակառուցվածքների մասով, և՛ տեխնիկական հագեցվածության մասով, ամեն ինչ արվում է, օգտագործվում են բոլոր ռեսուրսները և՛ մեր բյուջեն, և՛ մեր արտաքին գործընկերների հետ համագործակցությունը՝ այդ բոլորն ավելի լավ վիճակի բերելու, կարգավորելու համար»։
Նունե ԱՐԵՎՇԱՏՅԱՆ
