Տուժող կողմին պատճառված գույքային վնասի պատասխանատուն Արամ Նավասարդյանը չէ: Այսօր Երևան քաղաքի առաջին ատյանի ընդհանուր իրավասության քրեական դատարանում դատավոր Կարեն Ֆարխոյանի նախագահությամբ ընթացող Սոնա Մնացականյանի գործով դատաքննության ժամանակ հայտարարեց մեղադրյալ Արամ Նավասարդյանի պաշտպանական կողմը:
Պաշտպանի խոսքով՝ դեպքի պահին Արամ Նավասարդյանը եղել ու գործել է որպես Ճանապարհային ոստիկանության (ՃՈ) ծառայող, ինչը էական նշանակություն ունի տուժող կողմի ներկայացրած գույքային հայցի առումով. «Նման պայմաններում ակնհայտ է, որ անհնար է քննարկվող իրավիճակը դիտարկել վնաս պատճառողի ընդհանուր նորմերի տեսանկյունից, քանի որ տվյալ դեպքում գործում են հատուկ կանոններ»:
Կարդացեք նաև
Պաշտպանը վկայակոչեց քաղաքացիական օրենսգրքով սահմանված աշխատողի կողմից ծառայողական ու աշխատանքային պարտականությունները կատարելիս վնաս պատճառելու հետեւանքով պատասխանատվությունը կարգավորող նորմերը: Ըստ պաշտպանի՝ կոնկրետ այս գործով գույքային պատասխանատվությունը պետք է դրվի Նավասարդյանի գործատուի վրա. «Մեր դեպքում Արամ Նավասարդյանի գործատուին՝ Ճանապարհային ոստիկանությանը, չեք ներգրավել որպես պատասխանող՝ զրկելով վերջինիս իր իրավունքների ու պարտավորությունների կատարման հնարավորությունից: Պատճառված վնասի համար պատասխանատու անձը Արամ Նավասարդյանը չէ»:
Հիշեցնենք, որ 2022 թվականին Նիկոլ Փաշինյանի ավտոշարասյան կողմից Պարոնյան-Լեո փողոցների խաչմերուկում 29 ամյա հղի կնոջ՝ Սոնա Մնացականյանի վրաերթի գործով մեղադրանք էր առաջադրվել ոստիկանության մայոր Արամ Նավասարդյանին: 3 տարի տեւած դատաքննությունն այսօր ավարտվեց, դատարանը հեռացավ խորհրդակցական սենյակ վճիռ կայացնելու, այն կհրապարակվի այսօր երեկոյան:
