Կարևոր է, որ պետությունը հաշվարկներ ունենա, թե արբիտրաժային վեճերի այս կամ այն ելքն ինչ հետևանք կունենա ՀՀ տնտեսության վրա, ArmeniaSputnik–ի հետ զրույցում ասաց Միջազգային արբիտրաժի փորձագետ Սարգիս Գրիգորյանը` անդրադառնալով ՀՀ կառավարության` Ստոկհոլմի առևտրային պալատի արբիտրաժային ինստիտուտում ՀԷՑ–ի սեփականատերերի հայցից պաշտպանվելու համար «Arnold & Porter» ընկերությանը 3.250.000 ԱՄՆ դոլար հատկացնելուն։
Եթե պետությունը չունի ինստիտուցիոնալ կամ մարդկային կարողություն, բնական է, որ պետք է դիմել միջազգային իրավաբանական գրասենյակների օգնությանը։
«Կան անհատներ, ովքեր ՀՀ-ում կամ ՀՀ-ից դուրս ունեն այդ փորձը և պատրաստ կլինեն մոբիլիզացնել ռեսուրսները։ Դա կարևոր է ոչ միայն ֆինանսական, այլև ազգային անվտանգության տեսանկյունից։ Խոսքն ապացույցների հավաքագրման, գաղտնի տեղեկատվության պահպանման և ներկայացման մասին է։ ՀՀ կառավարությանը տարբեր գործերով ներկայացնում են տարբեր գրասենյակներ, ինչը մտահոգիչ է», — ընդգծեց Գրիգորյանը։
