Հակակոռուպցիոն դատարանում` դատավոր Արամ Գրիգորյանի նախագահությամբ այսօր ՀՀ երրորդ նախագահ Սերժ Սարգսյանի, Վալերի Գրիգորյանի եւ Ալեքսան Ալեքսանյանի վերաբերյալ՝ Եռաբլուր պանթեոնի հարակից տարածքներում գտնվող հողատարածքների գործով դատական նիստում Սերժ Սարգսյանի պաշտպանական կողմը միջնորդեց դադարեցնել նրա նկատմամբ այս փուլում քրեական հետապնդումը:
Պաշտպաններից Ամրամ Մակինյանը (լուսանկարում) ներկայացրեց միջնորդության հիմքերը՝ հայտնելով, որ պաշտպանական կողմը ծանոթանալով վարույթի նյութերին՝ արձանագրում է, որ դատավարական օրենսգրքի այնպիսի էական խախտումներ են եղել, որոնք հանգեցրել են Սերժ Սարգսյանի՝ արդար դատաքննության հիմնարար իրավունքի արժեզրկման: Ըստ պաշտպանի՝ այդ խախտումները չեն կարող վերացվել դատաքննության ընթացքում, հետեւաբար այս իրավիճակում եւ այս փուլում քրեական հետապնդումը միջնորդում են դադարեցնել:
Հանրային մեղադրողը առարկեց միջնորդությանը: Ասաց՝ այս միջնորդության վերաբերյալ որոշում կայացնելու համար անհրաժեշտ է հետազոտել քրեական գործով որոշ ապացույցներ, ապա ասաց՝ այս միջնորդության քննարկումը ողջամիտ չէ, ենթակա է այս փուլում մերժման, քանի որ պատշաճ փուլում չի ներկայացվել:
Դատարանը մերժեց քրեական հետապնդումը դադարեցնելու մասին միջնորդությունը:
Կարդացեք նաև
Դատական նիստում քննարկվեց նաեւ ստորագրությամբ չհեռանալու մասին 3-րդ նախագահի խափանման միջոցի հարցը:
Հանրային մեղադրողները միջնորդեցին, որ այս դեպքում ստորագրությունը չհեռանալու մասին խափանման միջոցը պահպանվի, քանի որ նա անցնում է մի քանի քրեական գործով: Հայաստանից հեռանալու ռիսկ կա:
Պաշտպանական կողմն էլ միջնորդեց վերացնել արգելքը, քանի որ գտնում են, որ ազատ տեղաշարժի իրավունքը չպետք է երկարատեւ խախտվի: Պաշտպանը նաեւ ասաց՝ հանրային մեղադրողից էլ չլսեց պատշաճ հիմնավորում, թե ինչու պետք է պահպանվի ստորագրությամբ չհեռանալու արգելքը:
Ամրամ Մակինյանն էլ ներկայացրեց քննիչի որոշումներ, որով թույլ է տրվել Սերժ Սարգսյանին նախկինում մի քանի անգամ երկրից բացակայել: Ըստ պաշտպանի՝ նախագահը բացակայել ու վերադարձել է: Նա նաեւ միջնորդեց վերացնել ստորագրություն չհեռանալու մասին խափանման միջոցը:
«Ո՞վ է կարծում, որ պարոն նախագահը կարող է դիմել փախուստի: Ես համոզված եմ, որ այդպիսի ողջամիտ ենթադրություն ունեցող մարդ չի կարող լինել»,- հռետորական հարց տվեց պաշտպան Մակինյանը:
Ալեքսան Ալեքսանյանի պաշտպանն էլ նկատեց, որ հանրային մեղադրող Հովակիմյանի դիրքորոշումը Սերժ Սարգսյանի խափանման միջոցի վերաբերյալ կտրուկ փոխվել է: Նախորդ նիստերին, ըստ պաշտպանի, նա լրիվ այլ դիրքորոշում ուներ. «Ինչո՞ւմ է կայանում դիրքորոշումների կտրուկ փոփոխությունը: Ես կարող եմ հետեւություններ անել, որ երեւի գլխավոր դատախազին դուր չի եկել նրա՝ նախորդ նիստերին հայտնած դիրքորոշումը»: Հանրային մեղադրողը կոչ արեց չհիմնավորված հայտարարություններ, հետեւություններ դատարանում չանել:
Դատարանը որոշեց պահպանել ստորագրություն չհեռանալու մասին խափանման միջոցը: 3-րդ նախագահի նկատմամբ կշարունակի կիրառվել համակցված գրավի եւ ստորագրություն՝ չհեռանալու մասին խափանման միջոցը:
Արփինե ՍԻՄՈՆՅԱՆ
