Ցեղասպանագետ, Ցեղասպանության թանգարանի նախկին փոխտնօրեն Սուրեն Մանուկյանն անդրադարձել է վարչապետ Նիկոլ Փաշինյանի այսօր հնչեցրած գնահատականներին` Հայոց Ցեղասպանության թեմայով:
Նա գրել է.
«Ի՞նչ է տվել/տալիս Հայոց ցեղասպանության ճանաչումը Հայաստանին։
Մեջբերեմ որոշ փոփոխություններով իմ հոդվածներից մեկը։
Կարդացեք նաև
ա/ Հայոց ցեղասպանության ճանաչումն ու դատապարտումը մշտապես «տաք» քննարկման մեջ են պահում Թուրքիայի կողմից կատարված ոճրի թեման, ինչը նաև մեր համար որոշակիորեն լուծում է ազգային անվտանգության ապահովման հարց։ Արցախում կատարված ցեղասպանական գործողությունները ցույց են տալիս, որ ցեղասպանությունը, կամ զանգվածային բռնություններով հարցերը լուծելու քաղաքականությունը ցավոք չի մնացել անցյալում։ Եվ հետապնդելով Հայոց ցեղասպանության ճանաչման միջազգային գործընթացը, հետամուտ լինելով բոլոր ցեղասպանությունների դեմ պայքարելու հարցերը՝ մենք որոշակիորեն բարձրացնում ենք սեփական անվտանգության մակարդակը։
բ/ Ցանկացած ճանաչում բարձրացնում է թեմայի նկատմամբ հանրային իրազեկության մակարդակը։ Դրան անդրադառնում են ԶԼՄ-ները։ Թուրքիան փորձում է հակազդել, դրանով իսկ ավելի բարձրացնելով թեմայի ճանաչելիությունը: Արդյունքում նրանք, ովքեր քաջատեղյակ են թեմային, ևս մեկ անգամ ստանում են առիթ թարմացնել իրենց գիտելիքները, ինչպես նաև թեմայով հետաքրքրվում են մարդիկ, ովքեր փորձում են հասկանալ՝ ինչն է ի վերջո ճանաչվել և ինչի դեմ են բողոքում թուրքերը: Այս գործընթացը նաև օգնում է պայքարել ժխտողականության դեմ։
գ/ Ճանաչումը քաղաքական ճնշում է Թուրքիայի նկատմամբ։ Հայոց ցեղասպանությունը հանցագործություն է, որ չունի վաղեմության ժամկետ։ Միաժամանակ դա չպատժված հանցագործություն է: Կատարվել է զարհուրելի ոճիր, բոլորին հայտնի է հիմնական ոճրագործը /թեև նա հերքում է իր մեղքը/, վերջին երկու տարիների ընթացքում հանցանքն ընդունել են նույնիսկ երկու մեղսակիցները /Ավստրիան և Գերմանիան/, սակայն հիմնական մեղավորը չի պատժվել, իսկ տուժած կողմը չի ստացել փոխհատուցում: Եվ այս իրավական անավարտությունը մեկ օր պետք է իր հանգուցալուծումը գտնի: Սակայն ներկա փուլում պետք է ընդունել, որ առավելապես քաղաքական ճնշման միջոցով է հնարավոր լուծել այս խնդիրը: Եվ ճանաչման գործընթացը հետապնդելը, ինչպես նաև արդյունք ձեռք բերելը, այդ ճնշման կարևորագույն բաղկացուցիչներից է։
դ/ Ճանաչման գործընթացը հետապնդելը Սփյուռքի հայկական համայնքների համար կարևորագույն միջոց է սեփական, հայկական ինքնությունը պահելու և ընդգծելու համար»:
