«Այս փոփոխությամբ նախատեսում ենք, որ մեր հանրակրթական ուսումնական հաստատությունները կունենան մեկ լիազոր մարմին, որը ԿԳՄՍ նախարարությունն է։ Ըստ էության՝ մեր երկրում բոլոր դպրոցներն, այսպիսով, անցում են կատարելու դեպի նախարարության լիազորությամբ գործելը»,- ՀՀ ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստի ընթացքում «Կրթության մասին» օրենքում և դրան կից մի շարք օրենքներում փոփոխություններ կատարելու նախագծի քննարկման ժամանակ տեղեկացրեց ՀՀ ԿԳՄՍ նախարար Ժաննա Անդրեասյանը։
Նա հայտնեց, որ այս պահին ունենք 1343 հանրակրթական հաստատություն, և ներկայումս նախարարությունը համակարգում է ընդամենը 123 դպրոցների գործունեությունը։
ԿԳՄՍ նախարարը վստահեցրեց՝ կրթության ոլորտում փոփոխությունները միտված են միասնական ստանդարտի սահմանմանը․ «Այդ իմաստով լիազոր մարմնի սահմանումն այս ձևաչափով կընձեռի ավելի մեծ հնարավորություն այդ ստանդարտների միասնականության ապահովման հարցում։ Շատ կարևորում ենք այն աշխատանքն ու ներգրավվածությունը տեղերում, որ ունեն մարզպետարանների աշխատակազմերը և Երևանի քաղաքապետարանը, և, բնականաբար, նրանք շարունակելու են ունենալ գործառույթներ՝ հիմնականում վարչատնտեսական ուղղությամբ։ Կան աշխատանքներ, որոնք ավելի ճիշտ է հետևել և կառավարել տեղում, և կան աշխատանքներ, որոնք միասնական՝ ավելի կենտրոնացված համակարգման տեսանկյունից կարող են ունենալ ավելի դրական արդյունքներ»։
Կարդացեք նաև
Ժաննա Անդրեասյանն ասաց՝ իրականում այս փոփոխություններով մեխանիկական փոփոխություն չի լինելու․ «Մենք ոչ թե նույն գործառույթները նախատեսում ենք լիազոր մարմնի փոփոխությամբ փոխանցել ԿԳՄՍՆ-ին, այլ նախատեսում ենք նաև իրականացվող գործառույթները վերափոխել»։
Ըստ Ժաննա Անդրեասյանի՝ գործառույթների ծավալը կրճատվելու է թվայնացման միջոցով։ Նա հայտնեց, որ այս ամենը նախատեսում են իրականացնել օրենսդրական փոփոխություններից հետո՝ մարզերի համար՝ 2026-ի սեպտեմբերի 1-ից, Երևանի համար՝ 2027-ի սեպտեմբերի 1-ից։
Հարցին՝ ի՞նչ կփոխվի կամ արդյոք փոխվելո՞ւ է որևէ բան ուսուցիչների և տնօրենների կյանքում այս նախագծի ընդունման պարագայում, Ժաննա Անդրեասյանը պատասխանեց․ «Հիմնականում փոփոխությունները տեղի են ունենում կառավարման գործառույթ ունեցող մարդկանց՝ տնօրենների համար։ Դրանք ամենատեխնիկական փոփոխություններն են՝ սկսած նրանից՝ ով էր տնօրենի հետ կնքում պայմանագիր․ երբ օրենքը փոխվի, այսուհետև նախարարի հետ է լինելու պայմանագրի կնքումը, գործուղում, արձակուրդ և նման գործառույթները։ Ուսուցիչների համար էական փոփոխություններ չպիտի լինեն։ Պայմաններ պետք է ապահովվեն՝ անկախ նրանից՝ ով է լիազոր մարմինը։ Ուսուցչին ընտրում է տնօրենը մրցույթի միջոցով՝ հանձնաժողովի կողմից։ Տնօրենը պիտի կարողանա աշխատակազմ ընտրել, կա որոշումների մեծ ծավալ, որը ճիշտ է կայացնել դպրոցի մակարդակում։ Խրախուսելու ենք, որ դպրոցներում ինքնավարության աստիճանը բարձրանա»։
Տաթև ՀԱՐՈՒԹՅՈՒՆՅԱՆ
