«Իրական խաղաղությունը գործընթաց է, որի արմատները հիմնված են արդարության, վստահության և արժանապատվության վրա։ Երբ նայում եմ օգոստոսի 8-ի գործարքին, տեսնում եմ արդարության, վստահության և արժանապատվության լիակատար բացակայություն»,- ՀՅԴ Հայաստանի Գերագույն մարմնի նախաձեռնությամբ «Արցախ․ չկարգավորված հակամարտություն, վերադարձի իրավունք» խորագրով միջազգային խորհրդաժողովի ժամանակ հայտարարեց ՀՀ նախկին արտգործնախարար Արա Այվազյանը։
Անդրադառնալով Վաշինգտոնում ստորագրված փաստաթղթին՝ նա նշեց․ «Վաշինգտոնում ստորագրված փաստաթուղթը օրինականացրեց ուժի կիրառումը, խրախուսեց էթնիկ զտումները և անտեսեց Արցախում հայկական ժառանգության և ինքնության միտումնավոր ոչնչացումը։ Այն ոչ մի փոխհատուցում չառաջարկեց բռնի տեղահանվածներին, ոչ մի արդարադատություն զոհերին և ոչ մի պատասխանատվություն՝ մեղավորների համար։ Սա խաղաղություն չէ, սա անարդարության կոդիֆիկացման փորձ է, հետևաբար Արցախի խնդիրը լուծված չէ, էջը փակված չէ»։
Նա նաև նկատեց․ «Մեզ ասում են՝ միայն Արցախի հարցից հրաժարվելով կարող ենք պահպանել մեր ինքնությունը և երաշխավորված մեր ապագան։ Այս պնդումը, որը կրկնվում է՝ որպես Աստվածաշնչյան պատգամ, բարոյապես սնանկ և կեղծ է, կույր՝ պատմականորեն։ Իրականում մեզ չեն առաջարկում խաղաղություն, այլ մեղսակցություն։ Սրանով փորձ է արվում հայ ժողովրդի ուշադրությունը շեղել և վերաձևավորել մեր ազգային ինքնությունը»։
Կարդացեք նաև
Տաթև ՀԱՐՈՒԹՅՈՒՆՅԱՆ
