Ցնցված եմ կատարվածից, բայց համոզված եմ, որ բոլշեւիկյան երանգներով այս տխուր գործելաոճը տեղ չի գտնի մեր իրականության մեջ, եւ շուտով կցրվի այս խայտառակ ու ամոթալի մղձավանջը։ Բոլշեւիկները մեզ դատում էին հայտնի անեկդոտի աբսուրդ մեղադրանքով՝ համառորեն լռեց եւ հակասովետական ժպտաց։ Հետագայում մենք անցանք այդ շինծու մեղադրանքի ու դրա հեղինակների վրայով։ Գալով ձեզ՝ հիշեցնեմ, որ պարսկահայերը մի մաղթանք ունեն, որի ստորակետն է որոշում ասվածի իմաստը. ստորակետի տեղը փոխում ես, իմաստը շրջվում է գլխիվայր։
Այն է՝ ա. սովորի՛ր, հորդ նման էշ չդառնաս,
բ. սովորի՛ր հորդ նման, էշ չդառնաս։
Այսպես, ստորակետները երբեմն կապվում են ստոր բաների հետ։ Մնում է՝ դուք էլ ստորակետների վրայով անցնեք, ինչպես որ մենք ժամանակին անցանք հակասովետական ժպտալու մեր մեղքի վրայով։
Կարդացեք նաև
Ռազմիկ ՄԱՐԿՈՍՅԱՆ
ԽՍՀՄ քաղբանտարկյալ
«Առավոտ» օրաթերթ
06.09.2025
