– Այսօր Միքայել սրբազանի ապօրինի դատավարության վերջին դատական նիստն է, մենք խիստ անհանգստացած ենք ոչ միայն մեր ընդհանրապես արդարադատության համակարգի համար, ոչ միայն նրանով, որ Նիկոլը շարունակաբար ընդվզումներ է անում Հայ Առաքելական եկեղեցու դեմ, ոչ միայն նրանով, որ այս ընթացքում է՛լ ավելի է սաստկացել սահմանների վիճակը, ազգային անվտանգության հարցերը, անհանգստացած ենք նաեւ նրանով, որ ամբողջ քաղաքական դաշտը, քաղաքական ուժերը սեւեռվել են ընտրությունների վրա այն պարագայում, երբ ասել ենք, որ հանցագործներին չեն թողնում ընտրություններին: Այսինքն՝ Նիկոլին չպետք է թողնել ընտրությունների մասնակցի, իրեն անհապաղ պետք է դատել իր կատարած հանցագործությունների համար -, այսօր Ազգային ժողովի շենքի դիմաց լրագրողների հետ զրույցում ասաց Բուդդայականության հոգեւոր ուսուցիչ Էլեոնորա Մանանդյանը:
Մանանդյանի մատնանշած մտահոգություններն այսօր համախմբել էին մի խումբ քաղաքացիների: Նրանք «Ազատություն սրբազանին, կանխել նզովյալ դատավաճիռը» կոչերով հավաքվել էին Ազգային ժողովի դիմաց ու երթով շարժվեցին դեպի Ազգային անվտանգության ծառայության շենք:
Հիշեցնենք, որ այսօր Երեւան քաղաքի առաջին ատյանի ընդհանուր իրավասության դատարանում Միքայել սրբազանի գործով վերջին դատական նիստն է նախատեսված: Ավելի քան երկու ամիս անազատության մեջ գտնվող Միքայել սրբազանը մեղադրվում է իշխանությունը զավթելու կոչերի համար:
Կարդացեք նաև
Էլեոնորա Մանանդյանը նկատեց, որ կրթությունից անընդհատ խոսող Փաշինյանը 7 տարում այնքան աղավաղեց ազգային արժեքները, որ այսօր ունենք ոչ մի բանի ուշադրություն չդարձնող քաղաքացիներ. «Ցավոք սրտի, զգալի զանգվածը մեզ մոտ ստրկամտությամբ է տոգորված: Իսկ իշխանական ռեսուրսը, որ ասում են, բավականին լուրջ տոկոս է կազմում՝ անկախ նրանից խրտվիլա՞կ է հայտնվում պաշտոնին, թե ով: Մարդկանց ստրկամտական մոտեցումն աշխատում է: Վերջին շրջանում ընդդիմադիր դաշտի ճնշող մեծամասնությունն այլեւս ոչ մի լուրջ պայքարի չի գնում, նույնիսկ տապալում են պայքարը, հենց Քոչարյանը: Նա տապալում է ցանկացած բողոք»:
Արփինե ՍԻՄՈՆՅԱՆ
