Կրեմլը համաձայն չէ ԱՄՆ նախագահ Դոնալդ Թրամփի ենթադրության հետ, թե Ուկրաինան կարող է հաղթել Ռուսաստանի հետ պատերազմում՝ պնդելով, որ Մոսկվան կշարունակի այն, ինչն անվանում է «հատուկ ռազմական գործողություն», քանի որ «այլընտրանք չի տեսնում»: Այս մասին հայտնում է The Moscow Times-ը:
ՄԱԿ-ի Գլխավոր ասամբլեայի շրջանակում Ուկրաինայի նախագահ Վլադիմիր Զելենսկու հետ հանդիպումից հետո Թրամփը հայտարարեց, որ Ուկրաինան կարող է վերադարձնել 2022 թվականին Ռուսաստանի լայնածավալ ներխուժումից հետո կորցրած տարածքները:
Ըստ Թրամփի՝ Ռուսաստանի կողմից արագ հաղթանակ տանելու ձախողումը ցույց է տալիս, որ ՌԴ-ն թույլ է, քան թվում էր: ԱՄՆ նախագահը գովաբանել է Ուկրաինայի ոգին՝ նշելով, որ այն «միայն ամրանում է»:
«Պարոն Թրամփը կատարվողի վերաբերյալ Զելենսկու տեսանկյունն է լսել: Եվ, ըստ երևույթին, այս պահին հենց այդ տարբերակն է հանգեցրել մեր լսած գնահատականին», – ասել է Կրեմլի խոսնակ Դմիտրի Պեսկովը RBC Radio-ին տված հարցազրույցում:
Կարդացեք նաև
Ավելի ուշ՝ մամուլի ասուլիսում Դմիտրի Պեսկովը լրագրողներին ասել է, թե սխալ կլինի մտածել, որ Ուկրաինան կարող է վերադարձնել տարածքները:
Պեսկովը RBC Radio-ին ասել է. «Ռուսաստանը կշարունակի հատուկ ռազմական գործողությունը՝ մեր ազգային շահերն ապահովելու համար… Մենք սա անում ենք երկրի ներկայի և ապագայի համար։ Գալիք շատ սերունդների համար»։
Նրա խոսքով՝ Ռուսաստանն «այլընտրանք չունի»։ Պեսկովը շեշտել է, որ Մոսկվան վճռականորեն է տրամադրված լուծելու Ուկրաինայում պատերազմի «հիմնական պատճառները»:
«Պուտինը բազմիցս փորձել և առաջարկել է լուծել այդ արմատական պատճառները», – նշել է Պեսկովը։
Թրամփը Ռուսաստանին «թղթե վագր» է անվանել՝ նշելով պատերազմից գրեթե չորս տարի անց Ուկրաինայի մեծ մասի վրա վերահսկողությունը ստանձնելու նրա անկարողությունը։ Նա մատնանշել է ուկրաինական անօդաչու թռչող սարքերի վերջին հարվածների ալիքը ռուսական էներգետիկ օբյեկտների վրա, որոնք բենզինի պակաս և ռեկորդային բարձր գներ են առաջացրել ամբողջ Ռուսաստանում։
«Ռուսաստանը դժվար թե վագր լինի», – RBC Radio-ին ասել է Պեսկովը։ «Այն ավելի հաճախ ասոցացվում է արջի հետ։ Եվ թղթե արջ գոյություն չունի։ Ռուսաստանը իսկական արջ է։ Պուտինը մեր արջին բազմիցս է նկարագրել և տարբեր տոներով։ Դրանում թղթե ոչինչ չկա»։
Թրամփը նաև, որպես Մոսկվայի վրա ճնշում գործադրելու միջոց, մի շարք երկրների՝ այդ թվում՝ Չինաստանին, Հնդկաստանին և ԵՄ անդամներին կոչ է արել դադարեցնել ռուսական նավթի գնումները:
Պեսկովը մերժել է այդ գաղափարը՝ ասելով, որ Ամերիկայի նախկին գործարար նախագահը փորձում է մեծացնել ամերիկյան էներգակիրների վաճառքը։
«Ամենապարզ բանը ամբողջ աշխարհին ստիպելն է գնել ավելի թանկ ամերիկյան նավթ և ավելի թանկ ամերիկյան հեղուկ գազ», – ասել է Կրեմլի խոսնակը: «Եվ առանց որևէ բարդ դիվանագիտական մանևրի դիմելու, Թրամփն, ըստ էության, դա է անում»։
Չնայած Ռուսաստանի վերաբերյալ իր հռետորաբանության խստացմանը, ԱՄՆ նախագահը մինչ այժմ խուսափել է ուղղակիորեն մեղադրել նախագահ Վլադիմիր Պուտինին Ուկրաինայի դեմ պատերազմ սկսելու համար: Ի պատասխան լրագրողների հնչեցրած հարցի, թե արդյոք նա կարծո՞ւմ է, որ Պուտինին կարելի է վստահել բանակցություններում, Թրամփն ասել է. «Ես ձեզ կտեղեկացնեմ մոտ մեկ ամսից»։
