«Գործը չի կարելի համարել բացահայտված, քանի դեռ դատարանը որոշումը չի կայացրել: Եվ սա մանիպուլյացիա է»,-ասաց վավերագրող, հանրային գործիչ Հովհաննես Իշխանյանը «Հայելի» ակումբում՝ արձագանքելով ՔԿ-ի հայտարարություններին, թե Փարաքար խոշորացված համայնքի համայնքապետ Վալոդյա Գրիգորյանի սպանության դեպքը բացահայտված է եւ այն վենդետայի արդյունք է:
«Մենք վաղուց գիտենք այս իշխանության ձեռագիրը: Հիշո՞ւմ եք, որ թափահարում էին, թե հոկտեմբերի 27-ը բացահայտված է, իբրեւ նոր բացահայտումներ են եղել: Մինչդեռ, հոկտեմբերի 27-ը վաղուց արդեն բացահայտված էր, որովհետեւ դատարանը որոշումը կայացրել էր: Կամ, հիշո՞ւմ եք՝ մարտի 1-ը բացահայտված է: Վերջերս Մարդու իրավունքների եվրոպական դատարանի վրա էր գցել մեր սիրելի դավաճանը՝ ասելով, որ ՄԻԵԴ-ը բացահայտել է մարտի 1-ը: ՄԻԵԴ-ը քննում է մարդու իրավունքների ոտնահարումները: Այն չի քննում քրեական հանցագործությունները: Այն կարող է քննել՝ արդյոք դատական պրոցեսում խախտվե՞լ է մարդու հիմնական իրավունքը արդյոք մարդը խոշտանգվե՞լ է: ՄԻԵԴ-ը չի կարող քննել՝ ով է կատարել եւ ով է հրաման տվել մարտի 1-ի ժամանակ սպանել 10 հոգու, որոնցից 2-ը՝ ոստիկան: Սա մեր սիրելի դավաճան Նիկոլ Փաշինյանը լավ գիտի:
Նրա հանդեպ ատելությունը նրանից է, որ նա մեր ժողովրդին է դնում անգրագետի, հիմարի, հարիֆի, մանկամտի, տհասի տեղ ու ապուշություններով փորձում է մոլորեցնել՝ չհասկանալով, որ հայ ժողովուրդը նույնը չի, ինչ 2018-ին էր: Արդեն հասունացած ժողովուրդ է, փորձություններով անցած եւ փորձ կուտակած, հմտություն ձեռք բերած ժողովուրդ է: Այնպես որ, այս տակտիկան, որ պետք է շուտ ասել, որ բացահայտվել է, բնականաբար, հետեւություն անելու բազմաթիվ տեղիքներ է տալիս: Դրանցից մեկն էլ այն է, որ այս ահաբեկչության կազմակերպչական աշխատանքների սլաքները ուղղակի կամ անուղղակի ուղղում են Նիկոլ Փաշինյանի վրա: Ուղղակի այն պարագայում, եթե ուղիղ է ասել՝ գնա եւ ահաբեկչություն իրականացրու, անուղղակի, եթե նպաստել է դրան, ստեղծել է պայմաններ: Օրինակ, իրավապահ համակարգը ամբողջությամբ լծել է անմեղ բարերարների եւ անմեղ հոգեւորականների, հանրային, քաղաքական գործիչների «գլխին գործ սարքելուն»:
Տեսնում էինք չէ՞ Բագրատ արքեպիսկոպոսին ոնց են գաղտնալսում, հատուկ սարքեր էին դրել, հաստատ, ինչ-որ օպերատիվ խումբ աշխատում, իրենց էր լսում, լսածը մոնտաժում էին, մոնտաժածը խմբագրում էին: Հետո իր ամբողջ նախարարական, պատգամավորական ստրկական թիմին բաժանել էր տեքստեր, թե ով՝ ինչ պետք է ասի: Այսինքն, ամբողջ համակարգը անմեղ մարդկանց վրա գործ սարքելու գործին էր լծված:
Կարդացեք նաև
Եվ եթե այնտեղ այդ գործն են անում, բնականաբար, այստեղ պոտենցիալ հանցագործներն են, որոնք կարող են անել ինչ ուզեն: Եվ այստեղից հետեւություն, որ սա անուղղակի, պասիվ, խորամանկ ահաբեկչություն է Վալոդյա Գրիգորյանի դեմ եւ քննչական կոմիտե լինի, ԱԱԾ լինի, թե դատախազություն, նրանք բոլորը ի վիճակի չեն իրական եւ ենթադրյալ հանցագործներին ու կազմակերպիչներին ձերբակալել: Եվ ՔԿ նախագահն էլ, որը նշանակվում է անմիջականորեն վարչապետի կողմից, չի կարող այլ բան ասել»,- ասաց Հովհաննես Իշխանյանը:
Աշոտ ՀԱԿՈԲՅԱՆ
