2026 –ի խորհրդարանական ընտրություններին Նինա Կարապետյանցի՝ վարչապետի թեկնածությամբ մասնակցելու հայտ ներկայացրած «Նժար» շարժումը լինելու է կուսակցությունների դաշինք: Այս մասին այսօր լրագրողների հետ հանդիպման ժամանակ հայտարարեց շարժման համահիմնադիրներից, գյուտարար Արտաշես Իկոնոմովը:
Արտաշես Իկոնոմովի խոսքով՝ դեռեւս շարժում են, բայց ձեւակերպվելու են որպես դաշինք. «Կուսակցությունների դաշինք է լինելու: Այդ դաշինքը՝ որպես կոալիցիա, կոալիցիոն կառավարություն է ունենալու: Այդ ժամանակ էլ կորոշվի կառավարության կազմը»:
Արտաշես Իկոնոմով
Նինա Կարապետյանցն էլ նկատեց, որ լավ հասկանում է՝ ինչ պատասխանատվություն է ստանձնել, որ ոչ թե անձնական հավակնությունների, այլ ազգային համախմբման հարց է:
Կարդացեք նաև
-Հայաստանը կանգնած է վճռական ընտրության առաջ: Երկիրն այլեւս չի կարող շարունակել ներկայիս ճգնաժամային ուղով ընթացքը,- ասաց Կարապետյանցը:
Նրա խոսքով, ժողովուրդը պետք է ստանա Սահմանադրությամբ ամրագրված իր իշխանությունը, վերականգնի սեփական պետության նկատմամբ վստահությունը:
Նա ներկայացրեց նաեւ շարժման հռչակագիրը. «Կոչ ենք անում բոլոր առողջ քաղաքական, հասարակական ուժերին, ազնիվ քաղաքացիներին համախմբվել երեք կետերի շուրջ.
ա. պետական խորհուրդ: Առաջարկում ենք նախագահի ինստիտուտը փոխարինել կոլեգիալ, անկուսակցական բարձրագույն իշխանությամբ, որը կվերացնի սուպերվարչապետական լիազորությունները, դա կկանխի իշխանության մենաշնորհը, կերաշխավորի երկարաժամկետ լեգիտիմություն:
բ. Թվային պետություն, պետական կառավարման բոլոր գործառույթները պետք է դառնան մատչելի ու թափանցիկ,
գ. համապարփակ անվտանգային համակարգ: ՀՀ-ն պետք է ապահովի իր պաշտպանությունը ոչ թե արտաքին երաշխիքների , այլ սեփական ուժերի կազմակերպվածության վրա հիմնվելով»:
Արփինե ՍԻՄՈՆՅԱՆ
