Կառավարության այսօրվա նիստում չզեկուցվող հարցերի շարքում է «Հայ և ռուս ժողովուրդների բարեկամության թանգարանը» վերակազմակերպելու և Հայաստանի ազգային պատկերասրահին միացնելու նախագիծը։ Կառավարությունը որոշել է, որ թանգարանը կգործի Պատկերասրահի կազմում Աբովյան քաղաքի նոր մասնաճյուղում՝ «Սոցիալիստական մշակույթների թանգարան» անվանումով։
Նախագծի հիմնավորման մեջ նշված է, որ որպես Հայաստանի ազգային պատկերասրահի մասնաճյուղ՝ թանգարանը պետք է վերակառուցվի որպես Սոցիալիստական մշակույթների թանգարան։ Թանգարանի հիմնական նպատակը կլինի սոցիալիստական մշակույթի առաջացման և զարգացման գործընթացի ընթերցումները՝ կերպարվեստի, դիզայնի, կինոյի և ճարտարապետության նյութերի և թեմատիկորեն փոփոխվող մշտական ցուցադրության միջոցով։
ԿԳՄՍ նախարարության հեղինակած նախագծի նպատակը հիմնավորման մեջ բացատրվում է թանգարանի՝ այս տարիներին մեծ ակտիվություն չցուցաբերելու եւ նշանակալի ցուցադրություններ չկազմակերպելու հանգամանքով:
Թանգարանում պահվում է 886 առարկա։ Հաստիքների կրճատում նախատեսված չէ։ Տնօրենի պաշտոնը կվերափոխվի մասնաճյուղի վարիչի, իսկ հաշվապահինը՝ էքսկուրսավարի։
Արփինե ՍԻՄՈՆՅԱՆ
