Լրատվամիջոցներից մեկին տված հարցազրույցում ԱԺ պաշտպանության և անվտանգության մշտական հանձնաժողովի նախագահ Անդրանիկ Քոչարյանը հայտարարել է, թե 44-օրյա պատերազմի ժամանակ «վարչապետի բորտը» նույնպես օգտագործվել է Հայաստան զենք-զինամթերք ներկրելու նպատակով։
«ՉԻ»․ Ամեն անգամ, երբ իշխանական թիմում Անդրանիկ Քոչարյանի գործերը վատանում են, նա շտապում է էքսցենտրիկ հայտարարություններով մտնել Նիկոլ Փաշինյանի, մեղմ ասած, աչքը և այդպիսով ամրապնդել իր դիրքերը։ Այնպես որ՝ չզարմանաք, եթե վաղն էլ հայտարարի, թե «վարչապետի բորտով» (խոսքը նրան սպասարկող ինքնաթիռի մասին է) ոչ միայն զենք է ներկրվել Հայաստան, այլև Նիկոլ Փաշինյանն իր «պերերիվի փողով» է վճարել դրա դիմաց ու անձամբ էլ բեռնաթափել է «սնարյադների» արկղերը։
Բայց Անդրանիկ Քոչարյանն այս անգամ սխալվել է։ Իր այդ հայտարարության համար նրան հաստատ դատելու են։ Կամ պետական գաղտնիք հրապարակելու հոդվածով, կամ էլ՝ Նիկոլ Փաշինյանի դեմ սուտ մատնության համար։ Ի վերջո՝ ըստ Նիկոլի վերջին ամիսների «թարմացված ընկալումների», 44-օրյա պատերազմում Հայաստանը կոպտորեն խախտել է միջազգային նորմերը և հանդես եկել որպես ագրեսոր, հետևաբար՝ Անդրանիկ Քոչարյանը փաստացի նրան մեղադրում է միջազգային ահաբեկչությանը նպաստելու մեջ։
Եվ այնուամենայնիվ մի հարցում Անդրանիկ Քոչարյանն իրավացի է․ այն, ինչ տեղափոխվում էր «վարչապետի բորտով», իսկապես էլ էական ազդեցություն է ունեցել 44-օրյա պատերազմի ընթացքի և արդյունքների վրա։ Խոսքը Նիկոլ Փաշինյանի մասին է։ Այլ հարց է, թե ինչպե՞ս է Ադրբեջանին հաջողվել իր հաղթանակի ապահովման հարցում այդքան կարևոր դերակատարում ունեցած «սպառազինությունը» տեղափոխել Հայաստանին պատկանող ինքնաթիռով։
Կարդացեք նաև
Մեկնաբանությունը՝ «Չորրորդ իշխանություն»-ից:
