Ֆուտբոլի Հայաստանի ազգային հավաքականը աշխարհի 2026 թվականի առաջնության որակավորման փուլի չորրորդ տուրում Դուբլինում հյուրընկալվեց Իռլանդիային եւ պարտվեց 0:1 հաշվով: Առաջին 45 րոպեներն անցան զգուշավոր ու հավասար պայքարում: Անգամ գնդակին տիրելու ժամանակի առավելությունը մեր կողմն էր:
Ամեն ինչ փոխվեց հանգստից հետո, երբ մեր թիմի ավագ Տիգրան Բարսեղյանը, ամենայն հավանականությամբ ենթարկվելով մրցակից ֆուտբոլիստի սադրանքին՝ գլխով հարված հասցրեց նրա դեմքին ու 52-րդ րոպեին կարմիր քարտ ստանալով հեռացավ խաղադաշտից: Մնալով 10 ֆուտբոլիստով՝ մեր թիմը փորձեց անել առավելագույնը, սակայն տանտերերին հաջողվեց 70-րդ րոպեին գրավել Հայաստանի ընտրանու դարպասը, ինչն էլ դարձավ հաղթական:
Այս պարտությունից հետո Հայաստանի ազգային հավաքականը «F» խմբում երեք միավորով նահանջեց վերջին հորիզոնական:
Աշոտ ՀԱԿՈԲՅԱՆ
