ԱԺ նախագահ Ալեն Սիմոնյանը խորհրդարանում լրագրողների հետ ճեպազրույցում անդրադարձավ ադրբեջանական մամուլի հրապարակումներին, որ Հայաստանում անցկացվելիք Եվրոպական քաղաքական համայնքի գագաթնաժողովին Ադրբեջանի նախագահ Ալիեւը չի մասնակցի։
«Երեկ ավարտվեց Հայաստանում Եվրանեսթը, եւ ադրբեջանցի իմ գործընկերոջ հետ հանդիպման ժամանակ նա խնդրեց ինձ, որպեսզի ես փոխանցեմ, որ իրենք ՀՀ գալու հետ կապված որեւիցե խնդիր չունեն։ Եվ Եվրանեսթին իրենց չմասնակցելը պայմանավորված է զուտ այդ կազմակերպության հետ հարաբերություններով։ Եվ իրենք ոչ մի խնդիր չեն տեսնում մեր համագործակցության ու փոխադարձ այցերի հետ կապված։ Ես նաեւ խոսել եմ այդ ընթացքում, որ մենք ակնկալում ենք բոլոր նախագահների մասնակցությունը, դուք առանձնացնում եք Ադրբեջանի, Թուրքիայի, մեր անմիջական հարեւանների մասնակցությունը։
Ես կարծում եմ, որ նախ տեղին չէ առանձնացնել մեր հարեւանների մասով, որովհետեւ իրենք մեր հարեւաններն են, ով-ով, բայց մեր հարեւանները պետք է մասնակցեն։ Մենք, այնուամենայնիվ, ակնկալում ենք, որ բոլոր այն երկրները, որոնք մասնակցել են մշտապես, հնարավորություն կգտնեն ՀՀ այցելել այդ կարեւորագույն միջոցառման ժամանակ։ Ես չեմ կարծում, որ այդտեղ պետք է տեսնել այլ տրամաբանություն, որովհետեւ ակնհայտ է, որ նման բան լինելու պարագայում Ադրբեջանի նախագահը կամ կասեր, կամ պաշտոնական որեւիցե բան կլիներ»,- ասաց Ալեն Սիմոնյանը։
Նա նշեց, որ մասնակցելու հրավերը բոլոր երկրներին է ուղարկվել․ «Մենք ակնկալում ենք, որ թե Ադրբեջանի, թե Թուրքիայի նախագահներն այդ միջազգային մեծ կոնֆերանսին ներկա կգտնվեն։ Մենք էլ ամեն ինչ կանենք, որպեսզի ապահովենք, որ իրենց համար ստեղ հանգիստ լինի»։
Ալեն Սիմոնյանը հավելեց․ «Պատրաստ եղեք, հարգելի ժողովուրդ՝ ադրբեջանական պատվիրակություններն այցելելու են Հայաստան, Հայաստանի պատվիրակություններն այցելելու են Ադրբեջան։ Իհարկե, կան հարցեր, որոնք պետք է քննարկվեն, մասնավորապես, մեր գերիների, պահվող անձանց մասին հարցը, որը մեծագույն պրոբլեմ է։ Բայց, այնուամենայնիվ, շփումները շարունակվելու են, եւ մենք այդ շփումները խորացնելու ենք։ Եվ երբ ես ասում եմ՝ մենք, դա նաեւ իմ ընկալմամբ՝ ադրբեջանական կողմը նույն գծի վրա է»։
Ռոզա ՀՈՎՀԱՆՆԻՍՅԱՆ
