ՀՀ հակակոռուպցիոն դատարանում շարունակվում է Գյումրու քաղաքապետ Վարդան Ղուկասյանի, նրա որդու՝ Սպարտակ Ղուկասյանի, եղբոր՝ Գևորգ Ղուկասյանի, Սաշա Զաքարյանի և Արմեն Մաթևոսյանի նկատմամբ հարուցված քրեական վարույթի դատաքննությունը։ Այսօր դատարանը լսելու է այս գործով վկաներին։
Կալանավորված Վարդան Ղուկասյանը երբ ներս մտավ դատարանի դահլիճ՝ նրան նստածները դիմավորեցին ծափահարություններով։
Նա ողջագուրվեց որդու՝ Սպարտակ Ղուկասյանի հետ ու տեղավորվելով ամբաստանյալի աթոռին՝ ասաց․ «Լրատվականը թող ազատ լինի, այստեղ եք չէ՞, նկարահանում եք»։
Լրագրողներից մեկը հարցրեց՝ ինչպե՞ս եք, պարոն Ղուկասյան, որին նա պատասխանեց․ «Փառք տիրոջը, լավ ասենք, լավ լինի, Աստծո ողորմածությամբ լավ եմ, ձենս ոնց էր մի քիչ էն չէ, հա, որ հարցնում եք»։ Իրենով հետաքրքրվողներին ասում էր՝ «Փառք Աստծո, նորմալ է, ամեն ինչ լավ է, վսյո խորոշո»։
Կարդացեք նաև
Վարդան Ղուկասյանը ժպտում էր, ամեն ներս մտնողի բարևում ձեռքով, համբուրվում։
Նա նշեց, որ մտածում է երկնային արքայության մասին։ Այդ նեղությունը, ըստ նրա՝ «Էսօր կա, վաղը չկա, ինչպես ասում է վարդապետներից մեկը՝ մարդուս կյանքը երեք վայրկյան է․ մեկը ծնվելուց, մյուսը՝ հետադարձ հայացք գցելուց, մյուսն էլ մահանալուց։
Հիմա բոլորս պիտի մտածենք՝ Աստծո առաջ ի՞նչ պատասխան պիտ տանք, էդքան բան, մնացածը սաղ սուտ է, ունայնություն, ունայնություն»։
Կալանավորված Վարդան Ղուկասյանը, որն ամեն բան անում էր իր թիմակիցներին տրամադրությունը բարձր պահելու համար, ասաց․ «Բրեժնեևն էլ եկավ, գնաց, Սադամ Հուսեյնն էլ, անցողիկ կյանք է, մնում է մի բան, նայիր վերև»։
Այդ պահին ներս մտավ դատավորը՝ սկսելով դատական նիստը։
Նունե ԱՐԵՎՇԱՏՅԱՆ
