Ազատ գյուղի զինվորական կացարանի հրդեհի գործով մեղադրյալ Եղիշե Հակոբյանի պաշտպանն այսօր միջնորդեց Հակոբյանի խափանման միջոց կալանքը փոխել:
Պաշտպանն առաջարկեց այլընտրանքային խափանման միջոցներ՝ համակցված ձեւով, գրավ, տնային կալանք:
Եղիշե Հակոբյանի պաշտպանն իր միջնորդությունը հիմնավորեց նրանով, որ Հակոբյանը չի կարող ազդեցություն ունենալ որեւէ վկայի վրա, վկաները հանգամանորեն հարցաքննվել են, արդեն ավարտվել է վկաների հարցաքննությունը եւ դատաքննությունը գտնվում է ապացույցների հետազոտության փուլում, որի վրա նույնպես, ըստ պաշտպանի, Եղիշեն չի կարող ազդեցություն ունենալ:
Կարդացեք նաև
Նրա խոսքով՝ հանրային շահը չի պահանջում, որ Եղիշեն մնա կալանքի տակ, հանրային շահը պահանջում է, որ այս գործի բոլոր հանգամանքները բացահայտվեն:
Պաշտպանի այս միջնորդությունը զայրացրեց զոհված զինվորների հարազատներին:
-Բայց ինքը կարողանալո՞ւ է հասարակության մեջ երեւալ, մարդկանց աչքերին նայել,- արձագանքեց զոհված զինվորներից մեկի մայրը:
-Իրեն վաղուց պետք է գնդակահարեին կամ ցմահ տային,- շարունակեց այլ զինվորի հարազատ:
Իսկ երբ Եղիշե Հակոբյանը սկսեց խոսել տեղից, զոհվածների հարազատները ավելի զայրացան:
Դատարանը որոշեց՝ Հակոբյանի կալանքի ժամկետը երկարաձգել եւս երեք ամսով:
Արփինե ՍԻՄՈՆՅԱՆ
