Գյումրու Սուրբ Աստվածածին Յոթ վերք եկեղեցում վարչապետ Նիկոլ Փաշինյանի օրակարգով պատարագի մատուցումից հետո Շիրակի թեմի քահանա Տեր Նշան Պանֆյորովը լրագրողների հետ զրույցում ասաց․ «Բիրտ ուժով արված պատարագը պատարագ չէ, ուրիշի կանոնի ու վիճակի մեջ մտնելով՝ նզովքի արժանի բան է։
Այն մարդիկ, որոնք չհասկանալով, որ պատարագը սուրբ հաղորդության մոտենալ է, ապաշխարության, առանց ապաշխարության՝ մեր բոլոր եկեղեցու կանոններով, մեր հայրերի ասածներով, արժանի են նզովքի», -ասաց քահանան։
Հիշեցնենք, որ Շիրակի թեմի բոլոր քահանաները հրաժարվել էին պատարագ մատուցել վարչապետ Փաշինյանի օրակարգով, այն է՝ խմբագրել պատարագի տեքստն ու չհնչեցնել Վեհափառի անունը։
Տեսնելով, որ Շիրակի թեմում բոլորը հրաժարվել էին, հոգևորականի էին հրավիրել Արմավիրի թեմից։
Կարդացեք նաև
Պատարագը մատուցում էր Մկրտիչ քահանա Մուշադյանը։
Տեր Նշան Պանֆյորովը նշեց, որ նա թեև կարգալույծ արված քահանա չէ, բայց իրավունք չուներ մտնելու տարածք՝ առանց առաջնորդի թույլտվության, դա նզովքով պսակվող կանոն է։
Լրագրողների բնութագրմամբ, այսօր տեղի ունեցածը, այն է՝ շրջիկ քահանայով պատարագ մատուցելը Հայ Առաքելական եկեղեցու պատմության մեջ աննախադեպ էր։
Նունե ԱՐԵՎՇԱՏՅԱՆ
