Վարչապետ Նիկոլ Փաշինյանը, որին այսօր մերժեց Շիրակի հոգևորաց դասը․ բոլորը մի մարդու պես հրաժարվեցին պատարագ մատուցել նրա օրակարգով, խմբագրել պատարագի տեքստն ու չհնչեցնել Վեհափառ Հայրապետի անունը, պատարագի մասնակցեց Սուրբ Յոթ Վերք եկեղեցում։ Այն մատուցեց Արմավիրի մարզից բերված քահանա Մկրտիչ Մուշադյանը։
Պատարագը սկսվեց բավական ուշ, ավարտից հետո Նիկոլ Փաշինյանը շտապեց հեռանալ, թեև նրան եկեղեցու բակում բողոքներ ունեցող գյումրեցիներ էին սպասում։ Նրանք, նամակները ձեռքերին, կանգնած էին։
Դրսում ցուրտ էր, հորդառատ անձրև․ այն առավոտից մեկ վայրկյան անգամ չի դադարել, չնայած դրան՝ քաղաքացիները չէին հեռանում եկեղեցու բակից, թե հնարավոր է կարողանան տեսնել վարչապետին։
Կարդացեք նաև
Մեծ թվով ուժայիններ, որոնք ևս թրջվել էին, շատերը հոգնել, հսկողություն էին անցկացնում եկեղեցու մոտ ու ամբողջ Վարդանանց հրապարակում՝ փակելով բոլոր մուտքերը։ Նրանք հասարակ քաղաքացիներին չէր թույլատրում մոտ գնալ եկեղեցու շենքին։
«Իսկ ինչո՞ւ չի կարելի մտնել եկեղեցի», -հարցում էին բողոքավոր կանայք։
«Այդպես, չի կարելի և վերջ»,-պատասխանում էին ուժայինները։
Եվ երբ պատարագից հետո Նիկոլ Փաշինյանը դուրս եկավ եկեղեցուց՝ բնակիչները հեռացող վարչապետի հետևից սկսեցին գոռալ․ «Փաշինյան ջան, կանգնիր էլի, մեր տան հարցը մնաց»։
Քաղաքացիներից մեկն էլ բացականչեց՝ նրան հիշեցնելով, որ Արցախը հայկական է։ «Արցախը Հայաստան է», -բացականչում էր կինը։
Զուգահեռ Փաշինյանի համակիրները դիֆերամբներ էին ձոնում նրա հասցեին․ «Նիկոլ ջան, ցավդ տանիմ, մեր հզոր վարչապետ»։
Նշենք, որ ուժայինները խոչընդոտում էին լրագրողների աշխատանքը, քաշքշում նրանց, չէին թույլատրում մոտենալ Նիկոլ Փաշինյանին ու հարցեր ուղղել։ Լրագրողներից ոմանք փորձեցին բարձր հնչեցնել իրենց հարցը՝ Վարդանանց հրապարակով դեպի եկեղեցի շարժվող Փաշինյանին, սակայն նա ևս չլսելու տվեց։
Նունե ԱՐԵՎՇԱՏՅԱՆ
