«Սահմանադրական շարժումը Նիկոլ Փաշինյանի նախաձեռնությունը չէ․ Նիկոլ Փաշինյանից առաջ դեռ 2014 թվականին Սերժ Սարգսյանի օրոք է նախաձեռնությունը եղել։ Նիկոլ Փաշինյանը, իշխանության գալով, ընդհանրապես Սահմանադրության մասին խոսել չէր էլ ուզում։ Առաջին իսկ առիթով ասաց՝ սա շատ լավ Սահմանադրություն է։ Իմ ու իմ կողմնակիցների հետևողական ճնշումները, հետո արդեն 14 կուսակցության անընդմեջ դիմումները ստիպեցին Նիկոլ Փաշինյանին մտածել, որ ինքը բան է խոստացել»,- Ազգային համագործակցության կլոր-սեղանի կազմակերպչական խմբի նախաձեռնությամբ անցկացված «Ի՞նչ անել 2026 թվականի ընտրություններին ընդառաջ» խորագրով լսումների 2-րդ փուլի ժամանակ ասաց ԱԻՄ նախագահ Պարույր Հայրիկյանը։
Նա նշեց՝ երկու տարի ուշացումով Նիկոլ Փաշինյանը սկսեց սահմանադրական շարժումը․ «Նա մեր նախաձեռնությունը վերցրեց ու փչացում է։ Եթե մենք ամենահիմնականից չենք խոսում հաճոյանալու համար ամբոխին, իջնում ենք ամբոխի մակարդակին։ Իսկ ամբոխի մակարդակին իջնելը ոչ մի բանի չի տանի։ Եթե ես դրանով առաջնորդվեի, պիտի լսեի 220 հազար հայ կոմունիստներին, 12 միլիոն սովետական կոմունիստներին ու համարեի՝ ի՞նչ անկախություն, անկախության պայքար, ի՞նչ ինքնորոշում։ Իսկ ինքնորոշումն ամենակարևոր, ամենաառարկայական գլխավոր խնդիրն է՝ ամեն օր, ամեն րոպե»։
Արցախի հետ կապված Պարույր Հայրիկյանն ասաց․ «Այս իրավիճակում պետք է հիշենք՝ մանավանդ Արցախի ինքնորոշման հետ կապված, երբ հարց է լինում, ասենք, որ դա միջազգային ճանաչման հարց է։ Եթե այսօր Արցախի ինքնորոշումը մերժվում է, վաղը քաղաքակրթությունն է կործանվելու»։
Տաթև ՀԱՐՈՒԹՅՈՒՆՅԱՆ
Կարդացեք նաև
Լուսանկարը՝ Ազգային-ժողովրդավարական բևեռի
