«Genesis Armenia» ուղեղային կենտրոն/հիմնադրամի 5-րդ տարեդարձին նվիրված պաշտոնական միջոցառման սկզբում հրապարակվեց ապօրինաբար ԱԱԾ մեկուսարանում պահվող Բագրատ Սրբազանի ողջույնի ուղերձը։ Այն ընթերցեց Սրբազանի զարմուհին՝ Արփինե Զարգարյանը։
Օգտվելով առիթից՝ Aravot.am-ը նրանից հետաքրքրվեց Բագրատ Սրբազանի առողջությունով, քանի որ նրա տեսքը դատարանի դահլիճի ապակե պատից այն կողմ հանրության մեջ որոշակի մտահոգության տեղիք է տալիս։ «Սրբազանի առողջական վիճակը շատ լավ է, ավելի լավ, քան ինքը տարիներ փորձում էր հասնել այդ առողջականին։ Նիհարելը նպատակադրված է։ Անգամ անձնական քաշը նպատակադրված, հաշվարկված է։ Ինքն արդեն տասը տարուց ավելի ձգտում էր հենց այդ քաշին, որին հասել է այսօր։
Ամեն առավոտ ԱԱԾ-ի մեկուսարանում մարզվում է։ Ես տեղը չգիտեմ՝ ինչպես է, բայց որտեղ որ ինքը բանտարկված է, կա տարածք հատուկ մարզվելու համար։ Եվ ինքը ամեն առավոտ մարզումներ է անում։ Ես փաստացի կարող եմ ասել, որ մարզումներ է անում, որովհետեւ ինքը, որ հեռախոսով զանգի իրավունք ունի, ինձ հեռաձայնում է եւ ասում, որ մարզումներից իջավ։
Կարճ ասած՝ Բագրատ Սրբազանը շատ առողջ է, ինքն իրեն հետեւում է, անգամ՝ սննդակարգին։ Հաշվի է առնում, որ այնտեղ նույն քանակությամբ էներգիա չի կարող ծախսել, ինչ-որ առօրյա քայլելու, շարժվելու ազատության իմաստով։ Բայց հավաստիացնում եմ, որ ինքը հարյուր տոկոսով առողջ է»,-վստահեցրեց Բագրատ Սրբազանի մորեղբոր աղջիկը։
Կարդացեք նաև
Մեր հարցին, թե Սրբազանը կալանավայրում ո՞ւմ հետ է կիսում խուցը, Արփինե Զարգարյանը պատասխանեց. «Բագրատ Սրբազանը, Միքայել Սրբազանը, որը հիմա հիվանդանոցում է, եւ Արշակ Սրբազանը նույն խուցն են կիսում։ Նրանց առողջության մասին ավելին չգիտեմ։ Միայն երբ ամեն անգամ եղբորս ասում եմ՝ բարեւներ փոխանցիր Սրբազաններին, ասում է, որ լավ են եւ միասին կիսում են խուցը։ Նրանք բոլորն էլ մարտական են ավելի, քան մենք դրսում, եթե կարելի է սա դուրս անվանել»։
Աշոտ ՀԱԿՈԲՅԱՆ
