Aravot.am-ը Գառնի համայնքի ղեկավար Տիգրան Պողոսյանից հետաքրքրվեց, թե ինչպես է վերաբերվում նույն համայնքապետարանի աշխատակից Էդվարդ Ստեփանյանի՝ Ամենայն Հայոց կաթողիկոսին սպանելու կոչին: Ըստ «Իշխանություն» լրատվականի, ՔՊ-ի հետ առնչվող լրատվամիջոցի հետ զրույցում բռնության կոչ էր հնչեցրել հենց այդ մարդը, որը հայտնի է որպես «Ջնդոյի Էդո»:
Գառնու համայնքապետը մեր հարցը լսելով՝ նախ պատճառաբանեց զբաղվածությունը, որ չի կարող խոսել, հետո, երբ պնդեցինք կարծիք հայտնել, ասաց, որ չի տեսել այդ տեսանյութը: «Որ տեսանյութը չեմ տեսել, ի՞նչ մեկնաբանեմ, չեմ հասցրել ծանոթանալ… երբ ծանոթանամ, կզանգեք, կմեկնաբանեմ»,-ասաց «Ջնդոյի Էդոյի» ղեկավարը:
Հավելենք, որ բռնության կոչ պարունակող տեսանյութը առաջացրել է ֆեյսբուքյան բազմաթիվ օգտատերերի զայրույթը, եւ շատերը կիսվել են դրանով՝ սոցցանցում նշելով ՀՀ գլխավոր դատախազությանը, Քննչական կոմիտեին ու Ներքին գործերի նախարարությանը եւ հրավիրել նրանց ուշադրությունը:
Կարդացեք նաև
Հիշեցնենք, որ այս կիրակի Նիկոլ Փաշինյանն իր շրջիկ խմբով պատարագի էր մասնակցում Գառնու Սուրբ Աստվածածին եկեղեցում, որտեղ իր մասնակցությամբ նախորդ հավաքների համեմատ ավելի քիչ մարդ էր հավաքվել: Գառնու համայնքապետարանի աշխատակից Էդվարդ Ստեփանյանը եւս մասնակցում էր Փաշինյանի՝ Գառնու Սուրբ Աստվածածին եկեղեցում կազմակերպված հավաքին:
Գոհար ՀԱԿՈԲՅԱՆ
