-Ընդամենը վերջերս մենք ֆիքսեցինք իշխող ռեժիմի կցորդ հանդիսացող դատարանի հերթական ապօրինի որոշումը կապված «Իմնեմնիմի» փոդքասթի համահեղինակներ, քաղբանտարկյալներ Նարեկ Սամսոնյանի եւ Վազգեն Սաղաթելյանի վերաբերյալ:
Դատարանը հերթական անգամ երկարացրեց նրանց կալանքը՝ այս անգամ երեք ամսով: Քաղբանտարկյալ Նարեկ Սամսոնյանը հայտարարեց անժամկետ հացադուլ: Այսօր Հայաստանում կա քաղբանտարկյալ, որն այս պահին գտնվում է հացադուլի մեջ եւ կիրակի օրը տեղեկություն տարածվեց, որ նրան տեղափոխել են պատժախուց: Չլսված եւ չտեսնված բան է, որ հացադուլավոր անձին, քաղաքական բանտարկյալին տեղափոխում են ոչ թե հացադուլավորների համար նախատեսված հատուկ խուց՝ անհրաժեշտ պայմաններով, այլ տեղափոխում են պատժախուց,- այսօր ԵՄ դեսպանության դիմաց ի պաշտպանություն «Իմնեմնիմի» փոդքասթի համահեղինակներ Նարեկ Սամսոնյանի եւ Վազգեն Սաղաթելյանի բողոքի ցույցի ժամանակ ասաց «Անտիֆեյքի» լրագրող Դավիթ Ֆիդանյանը:
-Մենք ԵՄ դեսպանի ուշադրությունն ենք հրավիրում այս փաստին՝ ՀՀ-ում կալանավորված են մեդիադեմքեր, «Իմնեմնիմի» փոդքասթի համահեղինակներ, քաղբանտարկյալներ, որոնք արդեն գրեթե երկու ամիս անազատության մեջ են եւ նրանց կալանքը ապօրինի կերպով երկարացվեց եւս երեք ամսով:
Կարդացեք նաև
ԵՄ դեսպան, մեր բողոքը ուղղված է ԵՄ-ին, որովհետեւ ԵՄ-ը հետեւողական կերպով լռում է ՀՀ-ում փաշինյանական վարչախմբի կողմից իրականացվող բռնաճնշումների մասին…ԵՄ-ը՝ որպես ժողովրդավարական արժեքների ջատագով, պարտավոր է հետեւողական կերպով արձագանքել ՀՀ-ում տեղի ունեցող այս խայտառակ ապօրինություններին, որոնք կատարվում են այս իշխանությունների օրոք: ԵՄ-ը պարտավոր է մի կողմ դնել աշխարհաքաղաքական այսրոպեական առաջնահերթությունները ու իր ձայնը բարձրացնել տիրող իրավիճակի վերաբերյալ: ԵՄ-ը պարտավոր է դադարել լռել, որովհետեւ լռությունը հանցակցություն է: ԵՄ-ը պարտավոր է հավատարիմ մնալ իր իսկ կողմից որդեգրած արժեքների պաշտպանությանը, սակայն այս պահին ֆիքսում ենք, որ ԵՄ համար առաջնահերթություն են աշխարհաքաղաքական ռեալպոլիտիկ ասվածը, ոչ թե մարդու իրավունքները կամ խոսքի ազատությունը,- ասաց Ֆիդանյանը:
Բողոքի ցույցի մասնակիցները ԵՄ դեսպանին իրենց նամակը հանձնելուց հետո գնացին ԱՄՆ դեսպանատուն ու փորձեցին նաեւ ԱՄՆ դեսպանին իրենց նամակը փոխանցել, սակայն դեսպանատան աշխատակիցը չվերցրեց:
«Անտիֆեյքի» խմբագիր Աստղիկ Մաթեւոսյանն ասաց ՝ իրենք նաեւ էլեկտրոնային տարբերակով են նամակը փոխանցել. «Չեմ ուզում նամակ չվերցնելու առումով դիտավորություն տեսնել: Այստեղ նամակ չընդունելը պրոտոկոլային է: Բայց եւս մեկ անգամ ներկայացուցիչներին զգուշացրեցի, որ այո՛, դուք մեզ ասում եք էլեկտրոնային տարբերակով ուղարկեք, բայց մենք ուղարկում ենք, դուք չեք արձագանքում:
Խնդրեցի զգուշացնել, որ ո՛չ մեր նախորդ, ո՛չ էլ երեկ ուղարկած նամակներին դեռեւս պատասխան չի ստացվել, իսկ մենք ակնկալում ենք պատասխան»:
Արփինե ՍԻՄՈՆՅԱՆ
