Հայաստանը ԵԱՏՄ-ում կմնա այնքան ժամանակ, որքան դա հնարավոր կլինի, իսկ երբ դա անհնար կդառնա՝ Հայաստանի ժողովուրդը որոշում կկայացնի․ «Հայաստանը եւ խաղաղությունը․ ռիսկեր եւ հնարավորություններ» թեմայով համաժողովում հայտարարեց Նիկոլ Փաշինյանը։
Նա մանրամասնեց՝ ՀՀ կառավարությունն իրեն հաշիվ է տալիս, որ չենք կարող լինել միաժամանակ ԵՄ եւ ԵԱՏՄ անդամ, բայց առայժմ դա հնարավոր է․ «Հիմա այլ իրողություն է պարզվում․ այնուամենայնիվ, տարածք կա, որ այս ճանապարհով գնանք՝ լինելով ԵԱՏՄ անդամ։ Մենք հիմա այդ տարածքի մեջ ենք։ Մենք ձեւ չենք անում, մենք հստակ հայտարարում ենք, որ գնում ենք ԵՄ ճանապարհով, սակայն մենք այսօր ԵԱՏՄ անդամ ենք, ու դա նշանակում է, որ այս կետում անհամատեղելիություն չկա, հակառակ դեպքում դա հնարավոր չէր լինի։ Այնքան, որքան համատեղելիությունը հնարավոր լինի՝ կշարունակենք մնալ ԵԱՏՄ անդամ։ Երբ անհամատեղելիության անհնարինություն կարձանագրվի, մենք ՀՀ քաղաքացիների հետ կկայացնենք այն որոշումը, որը կբխի ՀՀ ժողովրդի ազատ կամարտահայտությունից»։
Նա հատուկ ընդգծեց ԵՄ-ին անդամագրվելու գործընթաց սկսելու մասին ՀՀ ԱԺ–ում ընդունված օրենքը․ «Սա անկյունաքարային նշանակություն ունի առաջին հերթին մեր երկրի անկախության և ինքնիշխանության ապահովման ու ավելի բարձր մակարդակ ապահովելու տեսանկյունից»։
Ըստ Նիկոլ Փաշինյանի՝ ՀՀ ռազմավարությունը Հայաստանը ԵՄ չափանիշներին համապատասխանեցնելն է։ Երբ սա դառնա իրողություն՝ կգա նաեւ քաղաքական որոշում կայացնելու ժամանակը․ «ՀՀ կառավարության ընկալումն այս հարցում միանշանակ է․ արդյոք մենք ուզո՞ւմ ենք լինել ԵՄ լիիրավ անդամ։ Այո, աներկբա եւ միանշանակ։ Մենք մեզ հաշիվ ենք տալիս, ու նախորդող շրջանի փորձը դա ցույց տվեց, որ երկրին չեն ընդունում Եվրամիություն, քանի դեռ տվյալ երկիրը չի համապատասխանել ԵՄ չափանիշներին»։
Կարդացեք նաև
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
