Մասիսի քաղաքապետ Դավիթ Համբարձումյանի խափանման միջոց կալանքը տնային կալանքով փոխելու վերաբերյալ Վերաքննիչ դատարանի որոշումից ոգեւորվել էին ոչ միայն դատարանում հավաքված քաղաքապետի աջակիցները, այլ նրա ընտանիքի անդամները:
-Պետք է տնային կալանք չտային, բաց թողնեին, բայց անչափ գոհ են նրանցից, իրոք այս դատավորներին հալալ է, ասում էի՝ արդարություն եթե լինի, կթողնեն, իրոք եղավ: Տղաս գոնե տանը կլինի՝ իր 4 անչափահաս երեխաների կողքին կլինի,- լրագրողներին ասաց Մասիսի քաղաքապետի հայրը:
Մասիսի քաղաքապետի կինն էլ լրագրողներին ասաց՝ իրենք այսօր դատարան էին եկել արդար որոշման ակնկալիքով. «Եվ շատ ուրախ ենք, որ դեռեւս վերջնականապես դատական համակարգը չի վախճանվել»:
Կարդացեք նաև
Համբարձումյանի կնոջ խոսքով՝ ամուսնու անազատության ընթացքում դժվար է եղել անչափահաս երեխաների համար, հատկապես փոքրիկը շատ է կարոտել ու անդադար հորից է հարցուփորձ արել տնեցիներից:
Հիշեցնենք, որ Վերաքննիչ քրեական դատարանն այսօր դատավոր Հարություն Պետրոսյանի նախագահությամբ, կազմով դատավորներ Մակար Կիրակոսյանի, Սևակ Համբարձումյանի որոշեց Մասիսի քաղաքապետ Դավիթ Համբարձումյանի խափանման միջոց կալանքը փոխարինել տնային կալանքով եւ գրավով:
Հիշեցնենք, որ Դավիթ Համբարձումյանը մեղավոր էր ճանաչվել Երևանի ընդհանուր իրավասության քրեական դատարանի կողմից եւ դատապարտվել ազատազրկման՝ 6 տարի 3 ամիս ժամկետով։ Համբարձումյանը մեղադրվում է իշխանափոխության օրերին դեպի Երևանի Հանրապետության Հրապարակ գնացող քաղաքացիներին զենքով բռնություն գործադրելու համար:
Ըստ իրավապահների՝ 2018-ի ապրիլի 22-ին ժամը 16-17-ի սահմաններում Հայանիստ-Հովտաշատ խաչմերուկի բանուկ հատվածում տեղի է ունեցել միջադեպ, որին մասնակցել են Մասիսի քաղաքապետն ու նրա եղբայրը։
Արփինե ՍԻՄՈՆՅԱՆ
Լուսանկարը՝ Դավիթ Համբարձումյանի ֆեյսբուքյան էջից
