ԱԺ «Պատիվ ունեմ» խմբացության քարտուղար Տիգրան Աբրահամյանը Մասիսի քաղաքապետ Դավիթ Համբարձումյանի քրեական հետապնդման երկու պատճառ է տեսնում, Նիկոլ Փաշինյանին իմպիչմենթ հայտնելու գործընթացում ընդդիմության միասնական թենածու լինելը եւ նրա աճող հեղինակությունը:
«Դավիթ Համբարձումյանը 2016-ին է հաջողություն գրանցել եւ այս իշխանության ժամակահատվածում է հաջողություն գրանցել, որովհետեւ հեղինակություն ունի իր համայնքում: Այս տեսանկյունից իշխանության ամբողջ շղթան տարբեր ուղղություններով անընդհատ զարգանալու է, սա ունի նաեւ ընտրական տրամաբանություն: Դաշտից հանել կամ թուլացնել այն բոլոր ուժերին ու գործիչներին, որոնք ունեն հնարավորություն այդ պայքարում հաջողություններ արձանագրել ու իշխանության համար խնդիրներ ստեղծել: Դավիթ Համբարձումյանի շուրջ ստեղծված այս իրավիճակը այդ ընդհանուր գործընթացի մի կարեւոր մասն է կազմում: Կարեւոր, որովհետեւ ՀՀ բարձրացրած օրակարգն այդ պահին միակն էր, որը քաղաքական հանգուցալուծում ենթադրում էր ընտրություններից դուրս՝ մինչեւ ընտրական գործընթացը»,- ասաց Աբրահամյանը:
Հիշեցնենք, որ Վերաքննիչ քրեական դատարանն այսօր դատավոր Հարություն Պետրոսյանի նախագահությամբ, կազմով դատավորներ Մակար Կիրակոսյանի, Սևակ Համբարձումյանի որոշեց Մասիսի քաղաքապետ Դավիթ Համբարձումյանի խափանման միջոց կալանքը փոխարինել տնային կալանքով եւ գրավով:
Կարդացեք նաև
Հիշեցնենք, որ Դավիթ Համբարձումյանը մեղավոր էր ճանաչվել Երևանի ընդհանուր իրավասության քրեական դատարանի կողմից եւ դատապարտվել ազատազրկման՝ 6 տարի 3 ամիս ժամկետով։ Համբարձումյանը մեղադրվում է իշխանափոխության օրերին դեպի Երևանի Հանրապետության Հրապարակ գնացող քաղաքացիներին զենքով բռնություն գործադրելու համար:
Ըստ իրավապահների՝ 2018-ի ապրիլի 22-ին ժամը 16-17-ի սահմաններում Հայանիստ-Հովտաշատ խաչմերուկի բանուկ հատվածում տեղի է ունեցել միջադեպ, որին մասնակցել են Մասիսի քաղաքապետն ու նրա եղբայրը։
Արփինե ՍԻՄՈՆՅԱՆ
