ՔՊ-ական պատգամավոր Սոնա Ղազարյանը ԱԺ ամբիոնից հայտարարել էր, թե տարիներ շարունակ Մայր Աթոռը չի թույլատրել ԿԳՄՍ նախարարությանը հոգեւոր երաժշտության փառատոն անցկացնել: Aravot.am-ի հետ զրույցում Մայր Աթոռի տեղեկատվական համակարգի տնօրեն Տեր Եսայի քահանա Արթենյանն ասաց, որ մերժում չի եղել։ Տարիներ առաջ նման դիմում եղել է, որին ի պատասխան Մայր Աթոռից, ըստ ընթացակարգի, պահանջվել է միջոցառման ծրագիրը՝ համերգի թույլատրելիությունը քննարկելու համար, սակայն հետագա ընթացք չի եղել:
Ինչ վերաբերվում է ՔՊ-ական մեկ այլ պատգամավորի՝ Թագուհի Ղազարյանի այն դիտարկմանը, որը ԱԺ-ում «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» օրենքում փոփոխություն կատարելու մասին նախագծերի փաթեթն էր ներկայացնում, որ «եթե ՀԱԵ-ին պատկանող Գեղարդից փշրանք է նվիրվել ռուս ուղղափառ եկեղեցու ներկայացուցիչ Ալեքսի պատրիարքին՝ նրա ծննդյան 75-ամյակի առիթով, ուրեմն ՀԱԵ-ն նման վերաբերմունք կարող է դրսեւորել նաեւ սեփականության իրավունքով իրեն պատկանող եկեղեցիների նկատմամբ», տեր Եսային հետեւյալը նշեց. «Չեք կարող մատնանշել որեւէ փաստ, որ Հայ Առաքելական եկեղեցուն պատկանող որեւէ հուշարձան կամ սրբավայր օտարվել է։ Հետևաբար` նման պնդումները բացարձակ անհիմն են։ Որեւէ եկեղեցի կարող է ծառայել միայն մեր ժողովրդի հոգեւոր կարիքների համար»:
Իսկ իշխող ուժի ներկայացուցչի այն արտահայտությանը, որ ծայրահեղ դեպքում պետք է եկեղեցին օտարվի, Մայր Աթոռի տեղեկատվական համակարգի ղեկավարն այսպես արձագանքեց. «Բացարձակ չի կարող քննարկվել եկեղեցին օտարելու հարց»
Գոհար ՀԱԿՈԲՅԱՆ
