Մասյացոտնի թեմը հայտարարություն էր տարածել, որ երեկվանից թեմի մի շարք քահանաների հետ կապ են հաստատել տարբեր անձինք եւ փորձել տարբեր եղանակներով՝ բարեկամական հորդորների, ծառայողական առավել բարվոք պայմաններ ապահովելու առաջարկների, ինչպես նաեւ սպառնալիքների միջոցով նրանց ուղղորդել միանալու թեմի նախկին առաջնորդին եւ ընդունելու նրա առաջնորդական իշխանությունը։
Վեդու Սուրբ Աստվածածին եկեղեցու հոգեւոր հովիվ տեր Հովսեփ քահանա Սարգսյանը Aravot.am-ի հետ զրույցում նշեց, որ արդեն պաշտոնական հայտարարության մեջ ամբողջությամբ արտահայտված է եղելությունը:
«Հանդիպում է եղել, ինձ առաջարկություն է եղել, որպեսզի միանամ նախկին առաջնորդ Գեւորգ սրբազանին: Ես այդ առաջարկությունը մերժել եմ՝ հաստատելով, որ եկեղեցու կարգ ու կանոնին հնազանդ եմ: Իհարկե, հանդիպումը քաղաքակիրթ ձեւով է ընթացել եւ ավարտվել: Ով եկել էր այդ հանդիպմանը՝ նման առաջարկություն անելու, ինձ ծանոթ մարդ էր՝ իմ համայնքից, որի հետ բազմիցս առնչվել ենք, լավ հարաբերությունների մեջ ենք եղել եւ հիմա էլ լավ հարաբերություններ ունենք: Ես իրեն սիրուն ներկայացրել եմ եկեղեցու կարգն ու կանոնը եւ իմ դիրքորոշումը, եւ այդպես խաղաղ կերպով իրարից բաժանվել ենք»,-ասաց տեր Հովսեփը:
Մեր հարցին՝ արդյոք մտավախություն չունի՞, որ կրկին կլինի նման հանդիպում, քահանան հետեւյալ կերպ արձագանքեց. «Հնարավոր է, չեմ կարող բացառել, որովհետեւ իրականում սա երկրորդ հանդիպումն է: Հնարավոր է հետագայում էլի ցանկանան հանդիպել, ես պատրաստ եմ, ծառայության մեջ եմ, եւ բոլոր հարցումներին, այդ թվում ձեր հարցմանն ի պատասխան պատրաստ եմ նորից կրկնել, վերահաստատել, որ մենք եկեղեցու ծառայողներ ենք եւ մեզ համար առաջին տեղում եկեղեցու կարգն ու կանոնը պահելն է: Մենք հնազանդ ենք եկեղեցու կարգ ու կանոնին եւ հնազանդ ենք լինելու»:
Կարդացեք նաև
Գոհար ՀԱԿՈԲՅԱՆ
