Փաստաբան Արա Զոհրաբյանը գրում է.
«Դատարանը պարտավորեցրել է քրեական վարույթ նախաձեռնել Նաթան սրբազանի հեռախոսային խոսակցության գաղտնիությունը ապօրինի խախտելու առիթով։
Իրականում հիշում եք, 2025թ. հոկտեմբերի 17-ին civic.am֊ն հրապարակել էր մի նյութ, որտեղ նշվել էր՝ «Համացանցում հայտնվել է Նաթան արքեպիսկոպոս Հովհաննիսյանի և կաթողիկոսի նախկին գավազանակիր Աղան աբեղա Երնջակյանի 2023 թվականի հոկտեմբերի խոսակցության ձայնագրությունը»։
Նույն աղբյուրում հրապարակվել է նաև հեռախոսային խոսակցության ձայնագրություն։
Կարդացեք նաև
Նույն օրը Քննչական կոմիտեն տեղեկացրել էր, որ նախաձեռնվել է քրեական վարույթ Քրեական օրենսգրքի 236-րդ հոդվածի 3-րդ մասի հատկանիշներով (իշխանական կամ ծառայողական լիազորությունները կամ դրանցով պայմանավորված ազդեցությունը օգտագործելով հավաք անցկացնելուն․․․ հարկադրելը․․․):
2025թ․ հոկտեմբերի 22-ին հաղորդում եմ ներկայացրել՝ խնդրելով քրեական վարույթ նախաձեռնել ՀՀ քրեական օրենսգրքի 206-րդ հոդվածի հատկանիշներով (հեռախոսային խոսակցության գաղտնիությունը ապօրինի խախտելը):
Ինչպես և սպասվում էր, 29.10.2025թ․ Քննչական կոմիտեն մերժել է քրեական վարույթ նախաձեռնելը, իսկ դրա դեմ բերված բողոքը 18.11.2025թ․, իր հերթին, մերժել էր ՀՀ գլխավոր դատախազությունը:
Իրավապահ մարմիններին ընդհանրապես չի հետաքրքրել, որ հեռախոսային խոսակցության նշված ձայնագրությունը կատարվել է գաղտնի և ամենայն հավանականությամբ տեղեկության գաղտնի հավաքման համար նախատեսված տեխնիկական հատուկ միջոցներ օգտագործելով, քանի որ միայն այդ կերպ էր հնարավոր երեք տարբեր անձանց հեռախոսային խոսակցությունները ձայնագրել։
Տարբերակելի է նաև, որ այդ խոսակցությունները հետագայում մոնտաժված և փոփոխված լինեն:
Գլխավոր դատախազության մերժումը ստանալուց հետո բողոք եմ ներկայացրել Երևանի առաջին ատյանի ընդհանուր իրավասության քրեական դատարան (դատավոր՝ Ա. Մելիքսեթյան):
Դատարանի որոշմամբ բողոքը բավարարվել է, և վարույթի հանրային մասնակցին հարկավորեցվել է նախաձեռնել քրեական վարույթ:
Դատարանը նշել է, որ «առերևույթ առկա են ՀՀ քրեական օրենսգրքի 206-րդ հոդվածով նախատեսված հանցանքի հատկանիշները, ուստի քննիչը պարտավոր էր քրեական վարույթ նախաձեռնել և ստուգել հաղորդման մեջ նշված փաստերը»:
