Ինչպես արդեն տեղեկացրել ենք, Ստրասբուրգում անցկացվում է Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանը։ Վեհաժողովի նախագահ Թեոդորոս Ռուսոպուլոսի՝ պաշտոնավարման ժամկետը լրացել էր, և Վեհաժողովն ընտրեց նոր նախագահ՝ ավստրիացի պատվիրակ Պետրա Բայերին։
Նստաշրջանի մեկնարկն արձանագրեց ԵԽԽՎ ամենաերկարակյաց պատվիրակ Էմանուելիս Զինգերիսը՝ մինչ նոր նախագահի ընտրությունը։ Էմանուելիս Զինգերիսը հայտարարեց․ «Եվրոպայի խորհուրդը ծնվել է Երկրորդ համաշխարհային պատերազմի ատելության և անմարդկայնության մոխիրներից, և հիմա մենք չենք կարող թույլ տալ, որ բռնապետերն ավելի համախմբված լինեն մեզնից։ Ոչ թե Ամերիկան է առաջնայինը, ոչ թե Ֆրանսիան է առաջնայինը կամ Լեհաստանը, Լիտվան, այլ մարդկությունն ու մեր համերաշխությունը։
Սրանք են մեր գաղափարախոսության հիմքերը։ Մենք պետք է հրավիրենք Վրաստանի, Կուբայի և Իրանի ազատության մարտիկներին՝ միանալ մեր հարթակին և բարձրացնել իրենց ձայնը։ Մենք չենք կարող թույլ տալ, որ մոլեռանդ կրոնական ռեժիմները, ինչպիսին է Ալի Խամենին, զավթեն իշխանությունը։ Մենք Իրանի ժողովրդի հետ ենք։ Պետությունները պետք է հիմնված լինեն աշխարհիկ և ժողովրդավարական հիմքերի և իշխանությունների տարանջատման վրա։
Եվ եթե ես լինեի Նոբելյան մրցանակի հանձնաժողովում, ես կխնդրեի առաջադրել նախագահ Վլադիմիր Զելենսկիի թեկնածությունը Նոբելյան մրցանակի համար»։
Կարդացեք նաև
Նշենք, որ լիագումար նիստի ընթացքում նաև տեղի ունեցավ Թեոդորոս Ռուսոպուլոսի պարգևատրման արարողությունը։
Այնուհետև նորընտիր նախագահ Պետրա Բայերը հայտարարեց, թե Բյուրոն որ թեմաներին է հավանություն տվել, որպեսզի քննարկվեն ընթացիկ և հրատապ քննարկման ընթացակարգով։
Հրատապ ընթացակարգով Վեհաժողովը կքննարկի «Միջազգային կարգի սպառնալիքները՝ Գրենլանդիայի օրինակը» թեման՝ հինգշաբթի առավոտյան, «Միջին Արևելքում քաղաքական ճգնաժամը․ մարդու իրավունքների և ազգային փոքրամասնությունների իրավունքների պաշտպանության կարիքը» թեման՝ հինգշաբթի օրվա երկրորդ կեսին և Եվրոպական Սոցիալական խարտիայի 65-ամյակը՝ հինգշաբթի օրվա երկրորդ կեսին։
Չորեքշաբթի ընթացիկ քննարկման ձևաչափով կքննարկվեն միջազգային արդարադատության պաշտպանությունը, Բնակչության պաշտպանության ապահովումը և միջազգային իրավունքի հարգումը Գազայում հրադադարից հետո թեմաները։
Վեհաժողովը նաև ընտրեց հանձնաժողովների նախագահներին։ ԵԽԽՎ հայկական պատվիրակության անդամ, ՀՀ ԱԺ «Քաղաքացիական պայմանագիր» խմբակցության անդամ Վլադիմիր Վարդանյանն ընտրվեց ԵԽԽՎ Կանոնակարգի, էթիկայի և անձեռնմխելիության հանձնաժողովի նախագահ։
Տաթև ՀԱՐՈՒԹՅՈՒՆՅԱՆ
