-ԱԱԾ տնօրեն Կառլոս Պետրոսյանի հետ երբեք որեւէ խոսակցություն չի եղել Նիկոլ Փաշինյանի մասին, որովհետեւ այն ժամանակ Նիկոլ Փաշինյան երեւույթ չի եղել,- այսօր լրագրողների հետ հանդիպման ժամանակ ասաց ՀՀ երկրորդ նախագահ Ռոբերտ Քոչարյանը՝ պատասխանելով հարցին, թե իր նախագահության տարիներին երբեւէ ԱԱԾ տնօրեն Կառլոս Պետրոսյանը իրեն զեկուցե՞լ է, որ Նիկոլ Փաշինյանը հավաքագրված գործակալ է։
«Ո՞վ էր Նիկոլ Փաշինյանը, ես ընդհանրապես էդ մարդուն չեմ էլ տեսել «ժիվոյ»։ Ինքն ինձ ընդհանրապես չի էլ հետաքրքրել»,–հավելեց Քոչարյանը:
Անդրադառնալով լուրերին, թե 2020–ի նոյեմբերին եւ 2023–ի սեպտեմբերին իր առանձնատանը ընդունել է փոխվարչապետ Մհեր Գրիգորյանին, եւ ինքն է Գագիկ Ծառուկյանին խնդրել, որ ԲՀԿ-ի քվոտայով Գրիգորյանը փոխվարչապետ դառնա Փաշինյանի կառավարությունում եւ համոզել վերջինիս, որ հրաժարական չտա, Քոչարյանն ասաց. «Ես Մհեր Գրիգորյանին տեսած չկամ, իր հետ խոսացած չկամ ընդհանրապես։ Ես չգիտեմ՝ որտեղից է այդ ինֆորմացիան, որ ինքն իմ տանը եղել է, կամ իրեն ինչ–որ բան համոզել եմ։ Անծանոթ եմ իրեն»:
Կարդացեք նաև
Պատասխանելով իրեն ուղղված այն մեղադրանքներին, որ իր իշխանության տարիներին վաճառեցին օտարներին կարեւոր նշանակության պետական գույքեր, ունեցվածք՝ կապի միջոց, հյուրանոցներ, հանքեր եւ այլն, Քոչարյանն ասաց. «Ճիշտ ենք արել, դրանք ամենից լավ գործարքներն են»:
Արփինե ՍԻՄՈՆՅԱՆ


















































