«Լոս Անջելես Թայմս». Կալիֆոռնիայի նահանգապետ Գևին Նյուսոմը հինգշաբթի քաղաքացիական իրավունքների վերաբերյալ բողոք է ներկայացրել ԱՄՆ Medicare և Medicaid ծառայությունների կենտրոնների (CMS) ղեկավար դոկտոր Մեհմեթ Օզի դեմ՝ վերջինիս կողմից հրապարակված տեսանյութից հետո, որտեղ Օզը Լոս Անջելեսում առողջապահական խոշոր խարդախությունները կապում է հայերին վերագրած հանցավոր խմբերի հետ։
Տեսանյութում, որը երեքշաբթի հրապարակվել է CMS-ի պաշտոնական սոցիալական հարթակներում, Օզը շրջում է Վան Նայս թաղամասում և հայտարարում, թե մոտ 3,5 միլիարդ դոլարի չափով Medicare-ի խարդախություն է իրականացվել հոսպիսների և տնային խնամքի ծառայություններ մատուցող կազմակերպությունների միջոցով՝ պնդելով, որ դրանց զգալի մասը կառավարվում է «ռուսահայ մաֆիայի» կողմից։
Տեսանյութի մի հատվածում Օզը կանգնած է հայկական հացի փռի ցուցանակի առջև և ասում է, որ իր հետևում տեսանելի գրությունն ու լեզուն «ընդգծում են, որ այստեղ գործ ունենք կազմակերպված հանցավոր մաֆիայի հետ»։
Առողջապահության և մարդկային ծառայությունների նախարարությանը հասցեագրված նամակում նահանգապետ Նյուսոմը կոչ է արել հետաքննել «Դոկտոր Օզի անհիմն և ռասիստական մեղադրանքները Կալիֆոռնիայի հայ ամերիկացիների հասցեին»։
Կարդացեք նաև
Նյուսոմի գրասենյակի բողոքում նշվում է, որ դաշնային առողջապահական կարևոր ծրագրերը ղեկավարող պաշտոնյայի կողմից արված նման ռասայական երանգավորում ունեցող և կեղծ հայտարարությունները կարող են լուրջ վտանգ ներկայացնել՝ խոչընդոտելով այդ ծրագրերին մասնակցությունը այն անձանց կողմից, որոնք թիրախավորվում են նման հայտարարություններով։
Տեսանյութում ցուցադրված խանութի սեփականատեր Մովսես Բիսլամյանը ABC7 հեռուստաալիքին հայտնել է, որ տեսանյութի լայն տարածումից հետո հաջորդ օրը իր բիզնեսի շրջանառությունը նվազել է մոտ 30 տոկոսով։
«Ես իսկապես հիասթափված եմ,– ասել է նա։– Նկարահանում են իմ ցուցանակը, իմ տարածքը և խոսում ինչ-որ խարդախության մասին, որի հետ մենք որևէ կապ չունենք»։
Տեսանյութը հրապարակվել է այն ֆոնին, երբ Թրամփի վարչակազմը սկսել է համազգային նախաձեռնություն՝ դեմոկրատների կողմից ղեկավարվող նահանգներում, այդ թվում՝ Մինեսոտայում, Կալիֆոռնիայում և Նյու Յորքում, դաշնային ֆինանսավորման խարդախությունների մասին մեղադրանքները բարձրաձայնելու նպատակով։
Տեսանյութի հրապարակումից մեկ օր անց Գևին Նյուսոմը X սոցիալական հարթակում հայտարարել է, որ իր գրասենյակը ուսումնասիրում է հաղորդումները, ըստ որոնց դոկտոր Օզը թիրախավորել է հայ ամերիկյան համայնքը։ «Պատմական զգայունությունների հաշվառումով մենք այս մեղադրանքներին լուրջ ենք վերաբերվում»,– գրել է նա։
Ի պատասխան՝ դոկտոր Օզը X-ում հայտարարել է. «Եթե Կալիֆոռնիայի խարդախությունների ճգնաժամի իրական պաշտպանություն գոյություն ունենար, մենք այն կլսեինք։ CMS-ը և իրավապահ մարմինները կշարունակեն իրական աշխատանքը՝ խարդախներին հետապնդելով, վերջակետ»։
Կալիֆոռնիայում առողջապահական խարդախությունների հետաքննությունը շարունակվում է դեռևս 2020 թվականից՝ «Լոս Անջելես Թայմս»-ի հետաքննությունից հետո, որը բացահայտել էր Medicare-ի մասշտաբային խարդախություններ նահանգի արագ աճող, բայց թույլ կարգավորվող հոսպիսային ոլորտում։ Թերթի վերլուծության համաձայն՝ 2010–2020 թվականներին Լոս Անջելեսի շրջանում հոսպիսների թիվը վեց անգամ ավելացել է՝ կազմելով նահանգի մոտ 1200 Medicare-հավաստագրված ծառայություն մատուցողների ավելի քան կեսը։
Հատկապես մեծ թվով հոսպիսներ են հայտնվել Սան Գաբրիել հովտից դեպի արևմուտք ձգվող միջանցքում՝ մինչև Սան Ֆերնանդո հովիտ, որն այժմ ունի հոսպիսների ամենաբարձր խտությունը երկրում՝ Վիկթորի բուլվարի շրջակայքում։
2021 թվականից ի վեր Կալիֆոռնիայի արդարադատության նախարարությունը հոսպիսային խարդախությունների գործերով մեղադրանք է առաջադրել 109 անձի դեմ և ներկայացրել 24 քաղաքացիական հայց։ Վերջին երկու տարիներին 280 հոսպիսների լիցենզիաներ են հետ կանչվել և գործունեությունը դադարեցվել, ըստ նահանգի հանրային առողջապահության վարչության տվյալների։
