Alpha Media House-ի հիմնադիր, կինոպրոդյուսեր Վիկտոր Սողոմոնյանի «Վարշավա’21» սերիալը հաղթող է ճանաչվել «Մեծ երկրի հերոսներ» կինոմրցանակաբաշխությանը՝ «Լավագույն սցենար և լավագույն գաղափար» անվանակարգում։
«Մեծ երկրի հերոսներ» III ազգային կինոմրցանակաբաշխությունը կայացել է Մոսկվայում՝ փետրվարի 11-12-ին։ Այն նվիրված է նախագծերին, որոնք ձևավորում են հերոսի կերպար, նպաստում են երիտասարդության կայացմանն ու դաստիարակությանը, առաջ են մղում ավանդական արժեքները ու արձագանքում աշխարհում առկա արդիական մարտահրավերներին։
«Ինձ համար մեծ պատիվ է հենց այս անվանակարգում մրցանակ ստանալ՝ այսքան նախագծերի մեջ։ Ցանկանում եմ շնորհակալություն հայտնել ժյուրիին՝ իսկապես բարձր գնահատականի համար։ Մի քանի խոսք. մենք մեր թիմով ժամանակին մտածեցինք, որ մեծ անարդարություն է այն, որ չկան ֆիլմեր ժամանակակից ռուս դիվանագետների մասին՝ մարդկանց, որոնք հսկայական աշխատանք են կատարում աշխարհում։ Հատկապես մեր օրերում, երբ գիտեք, թե ինչպիսի հասարակական-քաղաքական իրավիճակ է։
Սկզբում սկսվեց աշխատանքը դեսպանատան մասին ֆիլմի վրա, հետո ծնվեց «Վարշավա’21» նախագիծը, և այսօր հենց ժամանակն է բացել գաղտնիքը․ ապրիլի 29-ին Okko հարթակում կլինի «Վարշավայի» շարունակության՝ «Բեռլին’23»-ի պրեմիերան։
Կարդացեք նաև
Ցանկանում եմ շնորհակալություն հայտնել իմ համապրոդյուսեր Միխայիլ Վոլոբուևին, հրաշալի դերասաններ Դմիտրի Միլլերին, Դմիտրի Կուլիչկովին, ռեժիսոր Ֆելիքս Գերչիկովին, սցենարիստ Ռենատ Խայրուլլինին, օպերատոր Անտոն Կոստրոմինին և բոլոր նրանց, ովքեր իրենց ներդրումն ունեն այս նախագծում։
Եվ, իհարկե, մեծ շնորհակալություն Okko հարթակին՝ քաղաքական նախագծի նկատմամբ ուշադիր և նրբազգաց վերաբերմունքի համար (իսկ սա իրականում քաղաքական կինո է, որի նմանները այսօր շատ քիչ են)։ Նրանց շնորհիվ այս նախագիծը կայացավ և շարունակվում է», – մրցանակաբաշխության ժամանակ ասել է Վիկտոր Սողոմոնյանը՝ ստանալով հնգաթև աստղով արձանիկը Ռուսաստանի գրողների միության ներկայացուցչից։
Մրցանակաբաշխությանը ներկայացվել է 532 նախագիծ, իսկ պարգևատրումը տեղի է ունեցել փետրվարի 12-ին՝ 19 անվանակարգերում։
Մանրամասները՝ տեսանյութում
