«Վերջին շաբաթվա ընթացքում հիփոթեքային վարկավորման նվազում չկա, այսինքն՝ շարունակվում է բնականոն ընթացքով տեղի ունենալ։ Անշարժ գույքի շուկայի գների վերաբերյալ մենք տարբեր ազդակներ ենք ստանում։ Ազդակների մեծ մասը վերաբերում է նրան, որ վերջին շաբաթների ընթացքում հակառակը՝ որոշակի ակտիվություն է նկատվել այդ շուկայում, այսինքն՝ գործարքների իրականացում, մարդիկ հետաքրքրված են, ինչ-որ բաներ են գնում։ Սա միգուցե կապված է Իրանի զարգացումների հետ, բայց չէի ուզի միանշանակ ասել, որովհետեւ դրանց թվային արտացոլումը դեռ չենք տեսել»,- այսօր հրավիրած ասուլիսում ասաց ԿԲ նախագահ Մարտին Գալստյանը՝ անդրադառնալով հարցին, որ եթե Մերձավոր Արեւելքում կոնֆլիկտային իրավիճակը երկար տեւի, կարո՞ղ է ազդել անշարժ գույքի գների եւ հիփոթեքային վարկառուների վճարունակության վրա։ ԿԲ նախագահն ասաց, որ այս պահին այդ ռիսկերը չեն տեսնում։
Անդրադառնալով Իրանից հնարավոր ներգաղթին՝ ԿԲ նախագահն ասաց․ «Մենք հլա որ թվերի մեջ չենք տեսնում ծավալների այն մակարդակը, որը մեզ կարող է բերել մտահոգիչ իրավիճակի, որ արտաքին պահանջարկն այնքան բարձր է լինելու, որ գնաճը հավելյալ գնալու է վերեւ։ Իհարկե, մենք այդ սցենարը քննարկում ենք, ոնց որ արել ենք 2022 թվականին ռուս-ուկրաինական պատերազմի առաջին ժամանակաշրջանում։ Բավականին մեծ քանակությամբ Ռուսաստանի քաղաքացիներ, ոչ միայն Ռուսաստանից, կոնֆլիկտի հարակից երկրներից նույնպես տեղափոխվեցին Հայաստան շատ կարճ ժամանակահատվածում, ինչը գնաճի կտրուկ ավելացման բերեց։ Այս պահի դրությամբ մենք դեռեւս չենք տեսնում այդ հոսքը։ Եթե ունենանք, արձագանքը կլինի ադեկվատ այդ զարգացումներին»։
Մարտին Գալստյանը հավելեց․ «Ինչ վերաբերում է պոտենցիալ վտանգներին, որ կոնֆլիկտը ժամանակի մեջ կարող է ձգվել, եւ մենք գնանք ամենավատ սցենարով, ենթադրենք՝ Իրանում զարգացումներ լինեն, որոնք սիրիական սցենար են մեզ նկարագրելու, բնականաբար այդ սցենարները կարող են շատ վատ ազդեցություն ունենալ Հայաստանի եւ հարեւան երկրների վրա։ Պիտի հետեւենք, տեսնենք ինչ զարգացումներ են լինելու, ընթացքում, եթե պետք լինի, անպայման կմիջամտենք այն ձեւով, որը մեզ անհրաժեշտ է՝ մեր տնտեսությունը հեռու պահելու այդ վատ սցենարներից»։
Կարդացեք նաև
Ռոզա ՀՈՎՀԱՆՆԻՍՅԱՆ
Լուսանկարը՝ Նարեկ Ալեքսանյանի/«Հետք»
