ԲՀԿ նախագահ Գագիկ Ծառուկյանը որեւէ մեկից որեւէ պահանջ չունի․ այս մասին այսօր դատարանում հայտարարեց ինքը՝ Գագիկ Ծառուկյանը։
Հակակոռուպցիոն դատարանում՝ դատավոր Արամ Գրիգորյանի նախագահությամբ, այսօր շարունակվեցին ԲՀԿ առաջնորդ Գագիկ Ծառուկյանի եւ Սեդրակ Առուստամյանի գործով լրացուցիչ դատալսումները։ Նախորդ նիստում, հիշեցնենք, դատավորը Գագիկ Ծառուկյանի մասով արդարացման վերդիկտ էր հրապարակել։
Կարդացեք նաև
Գագիկ Ծառուկյանն արդարացման վերդիկտից հետո իրավունք ունի փոխհատուցում ստանալու՝ նյութական, բարոյական վնասի տեսքով, նաեւ քրեական հետապնդում իրականացրած մարմիններից հրապարակային ներողություն հայցել։ Գագիկ Ծառուկյանը նման որեւէ պահանջ չունի, քանի որ արդար դատական ակտ է կայացվել՝ հրապարակային դատաքննության արդյունքում։
Մանրամասները՝ տեսանյութում
Հիշեցնենք, որ Գագիկ Ծառուկյանին մեղադրանք էր առաջադրվել, որ 2008 թ.-ից հանդիսանալով «Ծառուկյան» կուսակցությունների դաշինքի ղեկավար, ինչպես նաև դրանում ընդգրկված «Բարգավաճ Հայաստան» կուսակցության նախագահ, ՀՀ ԱԺ 6-րդ գումարման՝ 2017 թ. ապրիլի 2-ի ընտրությունների ընթացքում, «Բարգավաճ Հայաստան» կուսակցության օգտին հնարավոր առավել ձայներ ապահովելու և դրա արդյունքում ՀՀ Ազգային ժողովում պատգամավորի համար նախատեսված առավել շատ մանդատներ ունենալու նպատակով, իր ղեկավարությամբ գործող կուսակցությունների դաշինքի և ընտրական ցուցակներում ընդգրկված թեկնածուների օգտին քվեարկելու համար ընտրակաշառք է բաժանել։
Սեդրակ Առուստամյանն էլ մեղադրվում է, որ 2002 թ.-ից հանդիսանալով «Մուլտի Գրուպ Կոնցեռն» ՍՊԸ գլխավոր տնօրեն՝ Գագիկ Ծառուկյանի ֆինանսավորմամբ ընտրողներին կաշառք տալու մեջ՝ նյութական եւ դրամական միջոցների տեսքով։ Գործով մեղադրյալ է նաեւ «Ծառուկյան» կուսակցությունների դաշինքի Գեղարքունիքի մարզի նախընտրական շտաբի պատասխանատու Վազգեն Պողոսյանը։
Գործը քննվում է շուրջ վեց տարի։
Նելլի ԳՐԻԳՈՐՅԱՆ
