-Նիկոլ Փաշինյանը պարտվում է ՀՀ քաղաքացիների հետ մենամարտը: Այն բոլոր տեսարանները, որոնք տեսնում ենք, այսպես ասած, ախմախ ավտոբուսի շրջանառության ժամանակ, վկայում է այն մասին, որ այն, ինչը սարքած չէ, վատ է Նիկոլի համար,- այսօր լրագրողների հետ զրույցում ասաց ՀՀԿ փոխնախագահ Արմեն Աշոտյանը:
Նրա խոսքով՝ մետրոյում աղմուկ հանած դեպքն այն մասին էր, որ ՀՀ-ում կան մարդիկ, որոնք չեն վախենում խոսել. «Որքան էլ Նիկոլը փորձում է վախի մթնոլորտ սերմանել, որքան էլ իր սպասարկուները ասում են՝ դա ժողովրդավարություն է, դե եթե այդպես է՝ ամենամեծ ժողովրդավարությունը մեր ժամանակ էր: Ես կրթության նախարար էի, Բաղրամյանում ինչ ասես ինձ չէին գոռում»:
Կարդացեք նաև
Անդրադառնալով գալիք խորհրդարանական ընտրություններին՝ Աշոտյանը հիշեց, որ 2021-ին Փաշինյանը գնում էր ընտրությունների խաբեությամբ. «Իր նախընտրական ծրագիրը խաբեություն էր, ոչ միայն տնտեսական ու այլ բլոկերով, այլեւ Արցախի մասով խաբեություն էր… Նիկոլն այս անգամ ազնիվ է, եթե 2026-ին նա վերալեգալացվի որպես վարչապետ, ոչ մեկն էլ չի կարող ասել, որ խաբել ես ժողովրդին, ինքն էլ չի խաբել, ասում է՝ Արցախ չկա, Ղարաբաղ է, Ղարաբաղն էլ Ադրբեջանինն է»:
Աշոտյանը Փաշինյանի սրտիկների հետեւում Ալիեւի բեղերն է տեսնում. «Էդ սրտիկը կազմված է Ալիեւի ձեռքերով ու տակը ոչ մի խաղաղության մասին խոսք չի կարող լինել… ինքը անընդմեջ կոնտենտ է արտադրում, իրենով է լցնում: Ընդդիմությունը, երբ ամբողջ քաղաքական դիսկուրսը վերածում է կարտոշկի, ինքը էդտեղ կրած է, որովհետեւ կարտոշկի մեջ ինքը մասնագետ է…Նիկոլի աչքը չպետք է կարտոշկա ու կուկուռուզ մտցնել, որովհետեւ իր աչքը այդ տեսակետից անհուն է»:
Արմեն Աշոտյանը անդրադարձավ նաեւ Եվրոպական խորհրդի ընդունած ԵՄ ընդլայնման հարցերով զեկույցին ու Փաշինյանի թրենդին պատասխանելով՝ «մարտահրավեր» ուղարկեց նրան. «Նիկոլին չելլենջ եմ առաջարկել, ասել եմ՝ Նիկոլ, եթե ԵՄ խորհրդարանի կողմից հրապարակված քարտեզի վրա որպես ԵՄ պոտենցիալ թեկնածու երկիր գտնես Հայաստանը ես քեզ նվիրում եմ 100 կգ մակարոն, որ շարունակես կախել մեր միամիտ քաղաքացիների ականջներին»:
Արփինե ՍԻՄՈՆՅԱՆ
