Բագրատ սրբազանի և մյուսների գործով անցնող Արմեն Ալեքսանյանը այսօր Փաշինյանին էր նմանակել: Փաշինյանի հայտնի ցիլոյից գլխին եկել էր դատարան:
«Ես էլ էի ժամանակին դնում, ինքը որ դրեց, արդեն ոնց որ հարամեց: Բայց դե ես էլ եմ շարունակելու դնել»,- դատարանի շենքի բակում լրագրողների հետ զրույցում ասաց Ալեքսանյանը։
«Մինչև 2020 թվականն աջակցել եմ այս իշխանություններին: Մենք Արցախում շատ բան տեսանք՝ վատ քայլեր, որ այս իշխանության օրոք եղան: Իշխանությունը մեզ տարավ պարտության, դրանից հետո դադարեցի աջակցել: Երբեք չէինք պատկերացնի, որ Հայաստանն այս վիճակին կհասնի: Կորցրինք Արցախը, հիմա էլ կորցնելու ենք Հայաստանը, եթե 2026-ին ընտրվի»,- ասաց Ալեքսանյանը։
Կարդացեք նաև
Հիշեցնենք, որ ըստ Ալեքսանյանի պաշտպան Ալեքսանդր Կոչուբաևի, Ալեքսանյանի մեղադրանքի հիմքում դրվել է նրա՝ բաստուրմայով ձվածեղ պատրաստելու տեսանյութը:
Արցախի պատգամավոր Հակոբ Հակոբյանն էլ անդրադարձավ արցախցիներին «փախածներ» որակող Փաշինյանի հայտարարություններին. «Անկախ նրանից, թե Նիկոլ Փաշինյանն ինչ է ասում, պատմության իրողությունները և տեղի ունեցածը ոչ ոք չի կարող իր ուզելով-չուզելով գնահատական տալ: Արցախում տեղի ունեցավ էթնիկ զտում, ցեղասպանություն, որի պատճառով մի ողջ բնիկ ժողովուրդ բռնագաղթվեց իր հայրենիքից…
Փաշինյանն ամեն ինչ անելու է, որ արդարացնի Ադրբեջանի ռազմաքաղաքական հանցագործ իշխանություններին, որոնք ցեղասպան գործողություններ կատարեցին: Չեմ կարծում, որ Արցախի ժողովուրդը մինչև վերջին մարդը պետք է զոհվեր, որ Փաշինյանը նոր հասկանար, որ այնտեղ պայքար է տեղի ունեցել»:
Արփինե ՍԻՄՈՆՅԱՆ
